Politimesteri: Suleqatigiinnerunissaq neriuutigaara
Tasiilami isumaginninnikkut ajornartorsiutit ulluni makkunani oqallisaaqisut iluarsinissaat siunertaralugu Politimesteri ima siunnersuuteqarpoq:
- Oqarusuppunga suleqatigiinneq. Inuinnaat susassaqartullu akornanni suleqatigiinneq, apeqqutinut taamaattunut paqumiginnikkunnaarnissaq siunertaralugu, politimesteri Bjørn Tegner Bay KNR-imut oqarpoq.
Taanna tarnip pissusaa pillugu ilinniagalimmit qaammatit tamaasa sapaatit akunnerani ataatsimi Tasiilamut suliartortartumit isumaqatigineqarpoq. Taassuma neriuutaa tassaavoq allannguinissaq. Tamanna ima pisinnaanerarpaa:
- Namminersorlutik Oqartussanit Kommuneniillu iluminni suleqatigiinnerat nukittorsarneqarpat ersarissumillu isumaqatigiissusiortoqarpat, Paarnaq Rosing Jakobsen oqarpoq.
Pinerlunneq qanoq unnerluutigissaviuk?:
Pinerlunneq nalunaarutigissagukku najukkanni politeqarfimmut saaffiginnissaatit, imaluunniit politiit pigaartuinut 701448-mut sianerlutit.
Kinguaassiuutitigut atornerlunneqarsimaguit, nakuuserfigineqarsimaguit inuttulluunniit navianartorsiortitaaguit 701448-mut sianerit imaluunniit najukkanni politeqarfiliarit taava qanoq iliornissarnik siunnersorneqassaatit.
Pinerlunneq qaqugu unnerluutigissaviuk?:
Pinerlunnerup pereernerata kingorna sukkanerpaamik unnerluussinissaq pingaaruteqarpoq.
Tigusiffik: Kalaallit Nunaanni Politiit.
Ajornartorsiutit taamaattut aaqqissappata Tasiilami politiit amerlanerusut pisariaqartinneqanngitsut, suliassaminnullu kinguaattooqqanngitsut politimesterip erseqqissarpaa, atorfissaqartinneqartulli tassaanerarlugit isumaginninnermik suliaqartut amerlanerusut, tassa isumaginninnermut siunnersortit, perorsaasut, tarnip pissusaanik ilisimasallit tarnillu nakorsai Tasiilami meeqqanut ikiuigasuartussat.
- Meeraanerminni kinguaassiutimikkut atornerlugaasimasut inersimasunngoraangamik meeqqanik atornerluisartunngortartut nalaattakkagut amerlapput, taamaammat suleqatigiinnermut nukittunerusariaqarpugut, Bjørn Tegner Bay oqarpoq.
AAMMA ATUARUK Kinguaassiuutitigut pinerluttuliornerit paqumigisaajunnaarsillik
Tarnip pissusaanik ilisimasallit siornali januaarimi qaammatikkaartumik Tasiilamukartarnerat qaammat tulleq unissaaq.
