Kalaallit Nunaanni politiit: Kinguaassiuutitigut pinerluttuliornerit paqumigisaajunnaarsillik
Tasiilami isumaginninnikkut ajornartorsiutit amerlanerat isumakulunnartorujussuupput.
Taama erseqqitsigisumik oqariartuuteqartuuvoq, Kalaallit Nunaanni politimesteri Bjørn Tegner Bay.
- Nunarsuarmi nunaqanngilaq, ima ittunik suliassaateqanngitsunik. Kisianni Tasiilami ajornartorsiutit allanit, ilisimasaqarfigisannit, amerlasooriaammik amerlanerugamik. Taamaannera ernumalersitsisariaqarpoq. Meeqqallu naammattumik ikiornissaannut nukissaqaranilu periarfissaqannginnera, meeqqanut aserorsaataavoq, politimesteri oqarpoq.
Inuit ilaannut illoqarfiup eqqortumik isigineqarnissaa meeqqat atornerlunneqartut ikiornissaannit pingaarneruppat, taava ajornartorsiutivissuaqartugut isumaqarpunga
Tasiilami nunaqarfiinilu ukiut pingasut kingulliit ingerlanerani kinguaassiuutitigut pinerluttuliornerit 193-it nalunaarutigineqarput.
Meeqqanut kinguaassiuutitigut pinerluttuliornerit 20-it siorna nalunaarutigineqarput.
Meeqqanut kinguaassiuutitigut pinerluttuliornerit 15-it maanna suliarineqarput.
Politimesterip erseqqissaatigaa, Tasiilami pissutsit politiinit immikkut eqqumaniarfigineqarmata,
meeqqanullu kinguaassiuutitigut pinerluttuliornerit sulianut allanut sanilliullugit salliutinneqartut.
Tamaanna nalunaarutigaa, DR-imi piviusulersaarutip “Byen hvor børn forsvinder” takutinneqarnerata kingorna oqallisigineqarnerujussua pillugu.
Qunusaarinerit isumakulunnartinneqartorujussuupput
- Tassami tigusarineqassanatillu meeqqanik atornerluisartoqartoqarunarpoq. Politiilli iliuuseqassappata alloriarneq siulleq tassaavoq politiit ilisimatinneqarnissaat, Tegner Bay oqarpoq
Pinerluttuliornerit qanoq iliorlutit nalunaarutigissavigit :
Pinerluttuliornerit najukkami politeqarfik attavigissavat. Taanna matoqqappat nuna tamakkerlugu saaffiginnittarfimmut 701448-mut attaveqarsinnaavutit
Kinguaassiuutitigut pinerluttuliorfigineqaruit, annersarneqaruit, ulorianartorsiortinneqaruilluunniit 701448-mut imaluunniit najukkami politeeqarfimmut saaffiginnissaatit.
Pinerluttuliornerit qaqugu nalunaarutigissavigit;
Pingaaruteqarluinnaqqissaarpoq, pinerluttuliornerit piaartumik nalunaarutigineqarnissaat.
Kilde: Grønlands politi
- Paqumisunneq salliutinneqarpat tamanna ajornartorsiutaavoq.
Paqumisunneq unitsinneqartariaqarpoq pinerluttuliornerit tamaasa saqqummiutissagutsigit.
Nalunaarutigineqartartut amerleriarnerat nuannaarutaavoq.
Politimesterillu erseqqissumik maanna kaammattuutigaa, nipangiussineq unitseqqullugu taamatullu pinerluttuliornerit paqumigiunnaaqqullugit. Taamatullu aamma piviusulersaarummi pingaarnertut inuttaasup aappaata Naasunnguaq Ignatiussenip inuuniarnikkut ajornartorsiutit oqaluuserilermagit Facebookimi oqarasuaatikkullu qunusaarneqartarsimammat.
- Inuit ilaannut illoqarfiup eqqortumik isigineqarnissaa meeqqat atornerlunneqartut ikiornissaannit pingaarneruppat, taava ajornartorsiutivissuaqartugut isumaqarpunga, politimesteri oqarpoq.
Unnerluutiginninnerit amerleriarnerat pitsaasoq
Paqumigisanillumi allanngortitsiniarneq meeqqanik atornerluisarnerit pillugit ineriartornermi pitsaasutuanut ilaasutut oqaatigineqarsinnaavoq. Pinerluutit allat pillugit suliat assiginagit kinguaassiutitigut pinerluttuliuutit pillugit suliat ukiuni kingullerni tallimani amerleriarput.
- Imaanngilaq atornerluinerit amerlisut. Atornerluisoqartarneraana paqumigisaajunnariartuaartoq, taanna nassuiaavoq.
LÆS OGSÅ Hjælp fra Danmark giver ingen mening
Kinguaassiuutitigut atornerluinerit ullumi suliani sallersaapput, siornatigulli taamaasimanngilaq. Tamanna politiit unnerluutiginninnerni tigusakittarnerannik pingaarnermik pissuteqartoq, Bjørn Tegner Bay nangilluni nassuiaavoq.
- Maanna, unnerluutiginninnerit amerlineranni, malunnartumik iliuuseqarpugut. Ukiut marluk matuma siornatigut taamaaliorsimassagaluarpugut? Immaqami. Kisianni kingumut qiviaraanni, ajornartorsiut ukiut 30-it 40-it matuma siornatigut oqallisigineqarneq ajorami, Bjørn tegner Bay oqarpoq.
