Nunatsinni kommunefogedit ilinniartitaanermik, atortunik ikorfartorneqarnermillu amigaateqartut

Kommunefogedit najugaqarfiusuni minnerusuni pingaaruteqarluinnarput.

Taakku inuiaqatigiinni isumannaallisaanermik toqqissisimanermillu pilersitsinissaq suliassaraat – politiillu suliarisartagaannut, pisut ilungersunarnerpaat ilaannut ornigutsinneqartarlutik.

Kommunefogedilli amerlanerpaartaat suliassaminnut naammattumik piareersarneqarsimallutik misiginngillat.

Ilisimatusarfiup Kalaallit Nunaanni Politiit sinnerlugit kommunefogedit akissarsiaannik sulinermilu atugassarititaannik misissueqqissaarnerata nutaap tamanna takutippaa.

Misissueqqissaarnermi ilinniartitaanermik, atortunik, tarnikkut ikorfartorneqarnermik aamma politiit sinnerinik suleqateqarnermi ajornartorsiuteqartoqangaatsiartoq tikkuarpaa. Ilisimatusartut taakku ukiuni qulikkaani atuussimanerarpaat.

Tunngaviusumik naligiinngissuseqarnera pingaartumik erseqqissarneqarpoq: Kommunefogedit politiitut oqartussaassuseqartutut atuuttussatut naatsorsuutigineqarput, taakkuli piginnaasatigut, atortutigut ikorfartorneqarnermillu pisariaqartumik tamatigut peqartartutut misigisimanngillat.

Pikkorissaaneq ataqatigiissaakkamillu sungiusarneqarneq amigaataasut

Kommunefogedinit apersuilluni misissuinermi peqataasunit 29-nit 28-t pikkorissarnermik sungiusarnernilluunniit amigaateqarsoripput.

Taakku imminut illersornermik ilinniartinneqarnerunissamik, tarnikkut ikiueqqaarnermik, politiit tunngaviusumik periaasiannik, inatsisinik, attaveqaqatigiinnermik sulinermilu sungiusarnernik ilaatigut kissaateqarput.

Misissueqqissaarneq naapertorlugu ilinniartitaanerat politiit ulluinnarni peqqussutaanni piumasaqaatinut naapertuutinngilaq, immikkoortortaqarfinnilu arlalinni malitseqartitsineq amigaataalluni.

Ilisimatusartut kommunefogedit minnerpaamik ukiut tallimakkaarlugit pikkorissartinneqartarnissaat innersuussutigaat.

Ulluinnarni suliaqarnermi tarnikkut nanertuuteqartoqangaatsiartartoq

Kommunefogeditut suliaqarneq tarnikkut artorsaataangaatsiarsinnaavoq.

Apersorneqartut affaat sinnerlugit toqutsinermik, imminut toqunnermik imaluunniit toqusup timaanik misissuinermik suliaqarsimapput.

Kommunefogedit namminneq oqarnerat naapertorlugu sulinermi imminut toquttoqarnera toqusoqarneralu initunerpaasarpoq. Tamatuma kingorna angerlarsimaffimmi eqqissisimannginneq, nakuuserneq imigassamullu tunngatillugu pisut suliassaasarput.

Kommunefogedinit 29-nit 21-t suliffimmi nalaatatik pillugit oqaloqateqarnissamut pitsaanerusumik periarfissaqarnissartik kissaatigaat.

Tarnip pissusianik ilisimasalimmik oqaloqateqarsinnaaneq pingaarnerpaavoq. Apersorneqartut affaasa suleqatiminnik politiinilluunniit allanik assingusunik misilittagalinnik oqaloqateqarnissamut periarfissaqarnissartik aamma kissaatigaat.

Tamatuma saniatigut Kalaallit Nunaanni Politiit sinnerinut attaveqarneq immikkoortortaqarfimmit immikkoortortaqarfimmut assigiinngiiaarpoq.

Politiit immikkoortortaqarfiinit arfinilinnit marluk suleqatigiinneq qanittutut ingerlalluartutullu nassuiaatigineqarpoq. Immikkoortortaqarfiit sinnerini sisamani attaveqarneq annikinnerullunilu avissaanganerusutut misigineqarpoq.

Allaffik, atortut attaveqaqatigiinnissamullu periarfissat amigaataasut

Kommunefogedit sulinermi atortunik pisariaqartitaminnik aamma amigaateqarput.

Najugaqarfiusut marluk eqqaassanngikkaanni allaffiit, qarasaasiat printerilluunniit atugassaqanngillat. Taamaammat oqarasuaatit angallattakkat sulinermi atuini pingaaruteqarnerpaapput.

Misissueqqissaarnermi kommunefogedit sulinermi atisanik atortulersuutinillu pitsaanerusumik atugassaqarnissaat kiisalu oqarasuaatit angallattakkat attavilunnerani qaammataasatigut oqarasuaatinik atuisinnaanissaat ilisimasaqarnissaallu ilaatigut innersuussutigineqarpoq.

Ilisimatusartuttaaq najukkani annaassiniarnerni, ujaasinerni aamma tigusarineqarsimasunik angallassinermut angassinermut atortorissaarnerunissaat aamma innersuussutigaat.

Oqaatsit ajornartorsiutaasunut ilaapput.

Kommunefogedit kalaallisut pingaartumik oqaaseqartuupput, politiinilu sulisut sinneri – pingaartumik suliartortut – danskisut oqaaseqarnerullutik.

Taamaammat ilisimatusartut oqaatsinik sungiusarnissamut aamma oqaatsitigut ikorfartuinissamut nutserinermilu atortut pitsaanerusut periarfissaanissaat ilaatigut innersuussutigaat.

Kommunefogedit suli kajumissuseqartut

Naalli kommunefogedit akornanni ajornartorsiuteqartoqaraluartut suli kajumissuseqartoqangaatsiarpoq.

Kommunefogedinit 29-nit 24-t allat kommunefogedinngornissaat innersuussutigerusulluinnarpaat.

Taakku suliffiup soqutiginartuunera aamma inuiaqatigiinni akisussaaffimmik tigusinissamut, toqqissisimanermik pilersitsinissamut tapiissuteqarnissamullu periarfissiinera ilaatigut erseqqissaatigaat.

Misissueqqissaarnermi kommunefogedit akornanni kajumissuseqartoqannginneranik ajornartorsiuteqartoqannginnerarpaa. Sulinerannili sinaakkutini annerusumik ajornartorsiuteqarnerarlugu.

Suliniuteqarfiit arfinillit

Misissueqqissaarnermi suliniuteqarfiit arfinillit innersuussuteqarfigineqarput.

Ilinniartitaaneruneq, sungiusarneqarneruneq, tarnikkut ikorfartuinerup pitsaanerunissaa, kommunefogedit politiillu akornanni suleqatigiinneq avitseqatigiinnerlu nukittunerusoq kiisalu atortunut ininullu periarfissat pitsaanerusut ilaatigut innersuussutigineqarput.

Ilisimatusartuttaaq Kalaallit Nunaanni Politiit kommunefogedit aaqqissuussaanerisa siunissaat pillugu piffissaq ungasinnerusoq eqqarsaatigalugu periusissiornissaat innersuussutigaat.

Tassani najugaqarfinni minnerusuni oqartussanik allanik soorlu qatserisarfimmik peqqinnissaqarfimmillu suleqateqarneq ilaatigut misissorneqassaaq.

Politiit pisortaat, Bjørn Tegner Bay saqqummersitsinermut atatillugu ima oqaaseqarpoq:

- kommunefogedit pikkorissut nunaqarfinni sillimatitsisut toqqissisimatitsisullu taamaattumillu innuttaasunut tamanut ullut tamaasa allanngueqataasut uagut Kalaallit Nunaanni Politiini pinngitsoorsinnaanngilagut. Taamaattumik kommunefogedit sulinermi atugaat taakkunannga naatsorsuutigineqartunut ataqatigiinnissaat pingaaruteqarluinnarpoq. Taamaattumik kommunefogedit Kalaallit Nunaanni Politiinut atanerulersinneqarnissaat anguniarlugu Kalaallit Nunaanni Politiinit qanoq iliuuseqarsinnaanerput misissorparput.

Kalaallit Nunaanni Politiit kommunefogedit politiinut qanoq atanerulersinneqarnissaat misissorneqalereersoq paasissutissiissutigaat. 

Sulisussarsiorneq siunissami ajornakusoornerulissasoq

Nunatsinni kommunefogeditut atorfiit ullumikkut 74-iupput. 

Atorfiit arfinillit misissuineq aallartimmat inuttaqanngillat sulisoqassuserlu ukiuni tallimani kingullerni 30 aamma 37 procentit akornanniippoq. 

Taamaattumik Kalaallit Nunaanni Politiit kommunefogedinik nutaanik sulilersitsinissaminnik ataavartumik pisariaqartitsipput.

Misissueqqissaarnermi paasisat naapertorlugit, kommunefogedinik sulisussarsiorneq aalajangersimasumillu atorfeqartitsiniarneq siunissami suli ajornarnerulersinnaavoq. Innuttaasut nunaqarfinnit nuuttartut amerliartuinnarnerat tamatumunnga ilaatigut pissutaavoq. 

Ilisimatusartulli kommunefogedit kajumissuseqarlutik najukkami inuiaqatigiit akornanni pingaarutilittut suli inissisimanerat aammattaaq erseqqissaatigaat.

Kommunefogedit nunaqarfinni ilinniarsimanngitsut piffissallu ilaanni sulisartut akornanni akissarsiaginnerpaat ilaanneereerput amerlanerillu akissarsiatik naammaginartutut isigaat. 

Taamaattumik akissarsiaginnerulersitsineq sulisussarsiornermi ajornartorsiutinut aaqqiissutissatuaanavianngitsoq, misissueqqissaarnermi inerniliunneqarpoq. 

Kommunefogedilli nunaqarfinni pisoqarfiunerusuniittut ilai isumaqarput, akissarsiat suliat amerlassusaannut naleqqiullugit naapertuunnerusariaqartut.

Qangali ajornartorsiutaasut

Kommunefogedit aaqqissuussaaneranni ajornartorsiutit arlallit ukiuni qulikkaani arlalinni ilisimaneqarput. 

Sulinermi atugarititaasut ilungersunarnerat, pikkorissarnissamut, sakkortuumik pisoqarsimatillugu ikorfartorneqarnissamut, atortorissaarnerunissamut akissarsiagissaarnerunissamullu pisariaqartitsisoqarnera misissuinermit 1998-imeersumit ersersinneqareerpoq. 

Kommunefogedit 25-t najugaqarfinni inukinnerusuni 15-ini 2017-imi amigaatigineqarput.

Akissarsiat tungaatigut iluarsiinerit, sulinermi atisassaqartitsineq ilinniaqqinnerillu, naalakkersuisut oqarnerat naapertorlugu, sulisussarsionermi sunniutai taamani killeqarput.

Kommunefogedit tarnip pissusiannik ilisimasalimmik oqaloqateqarsinnaanissaannut, sulinerup kingorna oqaloqateqarsinnaanissaannut, sulinermi misigisat tungaatigut imaarsaneqarnissaannullu tunngatillugu politiit assigalugit periarfissinneqarnissaata pisariaqartinneqarnera 2022-mi aamma oqaatigineqarpoq. 

Naak ukiut 30-ngajaat ingerlaneranni misissuisoqaqattaareeraluarlunilu siunnersuisoqartareeraluartoq, kommunefogedit aaqqissuussaanerinut atatillugu ajornartorsiutaasartut arlallit suli atuunnerat misissueqqissaarnermit saqqummeqqammersumit paasinarsivoq. 

Politiit ajornartorsiutit ilisarisinnaavaat

Politiit pisortaata Bjørn Tegner Bayip inerniliussat arlallit ilisarai.

Tamannalu nuannaarutiginngilaa, KNR-imut oqarpoq. 

Kommunefogedit politeeqarfinnilu qaninnerni politiit attaveqatigiinniarnerisa ajornartorsiutaanera 

Kommunefogedit qaninnernilu politeeqarfinni politiit attaveqatigiinnerisa, pingaartumik kommunefogedinit amigarineqarnera eqqarsarnarpoq. 

- Qularinngilara suleqatigut kommunefogedit ulluinnarni ulapinnginnitsinni oqaloqatiginissaat puigorsinnaasaripput. Nunaqarfinni ajortoqartillugu attaveqarfigisarpagut, taava attaveqarfigilluartarpagut, taanna oqarpoq. 

Taamaattumik kommunefogedit qaangiataarneqarlutik misigisimappata paasilluarpai. 

- Kommunefogedit piffinni ulapinngiffinni qaangiataarneqarlutik puigorneqarlutilluunniit misigisimappata paasisinnaavara. Kommunefogedit oqaloqatigisarsimasinnaagaluarlugit oqaloqatigisuaannannginnerat ulluinnarni ulapaarfiit peqqutaagunarput, nalunaarummilu taanna inerniliussaq sulissutigissavarput aaqqiissuteqarfigalugulu.  

Politiit pisortaata oqarnera naapertorlugu, politiit kommunefogedit qanoq suleqatigilluarsinnaanissaannut suleqatigiissitalioreersimapput. 

Suleqatigiissitat kommunefogedit politiinut politeeqarfinnullu ataasiakkaanut qanoq qaninnerulersissinnaanerlugit pingaartumik sulissutigissavaat, Bjørn Tegner Bay oqarpoq.