Nunatsinni illoqarfinni arlalinni kigutilerisut amigaataasut
Nunatsinni illoqarfinni tallimani kigutilerisut amigaataasut, Naaja Nathanielsen (IA) peqqissutsimut naalakkersuisoq, Agathe Fontain (IA) sinnerlugu Siumumit Lars Poulsenimut akissuteqaammi allappoq.
Illoqarfiit Maniitsoq, Tasiilaq Nanortalik, Upernavik Aasiaallu kigutilerisunik innuttaasut kigutaannik maanna isumaginnissinnaasussarsiorput.
Pisortat suliffeqarfiutaat amerlasuut allat assigalugit atorfinittut piffissami sivikitsuinnarmi atorfeqartoqartarnera imaluunniit taartaasartoqarnera kalaallit kigutileriffiini tamakkiisumik atorfeqartitsiniarnermut akornutaapput.
Nunaqarfinni kigutilerisoqanngitsoq
Kigutinik isumaginninneq annikillisaaffigineqareerpoq, meeqqat inuusuttuaqqallu kisimik “akeqanngitsumik aalajangersimasumik akuttussusilimmik kigutileritinnissamut pisinnaatitaaffeqartut”, akissummi allassimavoq.
Illoqarfiit Ittoqqortoormiit, Kangerlussuaq Kangaatsiarlu kigutit nakorsaannut atorfeqanngilaq, nunatsinnilu nunaqarfiit tamarmik kigutit nakorsaannik – sapinngisamik – ukiumut ataasiarlutik tikittoqartarput.
Kigutinik isumaginninneq Peqqinnissaq pillugu ataatsimiititaliarsuup siorna aamma sammivaa, tassannga nunatsinni innuttaasut tamarmik kigutileritilluarsinnaalerniassammata susassaqarfimmik kivitsisoqartariaqartoq innersuussutigineqarpoq.
Namminersortunik ikiorneqarneq
Naalakkersuisut kigutinik isumaginninnermi namminersortunik ikiorneqarnerunissamut periarfissanik qulaajaasumik nassuiaammik aallartitaqarput.
Nassuiaat pisortat peqqinnissaqarfiata aamma peqqissaanermik suliaqartut namminersortut akornanni suleqatigiissinnaanermut atatillugu politikkikkut aalajangiinissamut aningaasatigut allaffissornikkullu sinaakkutissanut tunngaviliissaaq.
Naak nunatsinni tamarmi kigutit nakorsaanik ataasiinnarmik – Nuummiittumik namminersortoqaraluartoq.
