Sunoorsit inuusuttut akornanni atugaasoq: Kigutilutsitsisinnaallunilu angsteqalersitsisinnaasullu

Sunoorsit sikartitsinit soqutigineqarnerullutik atugaaneruleraluttuinnarput – pingaartumik inuusuttut akornanni.

Sunoorsinik nunatsinnut eqqussuineq 2020-mit 2022-mut qaffakkiartorsimasoq, Kalaallit Nunaanni Naatsorsueqqissaartarfimmit kisitsisit takutippaat. Sunoorsit 2022-mi 2.251 kiilu nunatsinnut eqqunneqarput.

Sunoorsit peqqinnanngitsuni ajunnginnerusutut amerlasuut immaqa eqqarsaatigisarpaat – taamaattoqanngilarli.

Sunoorsit Nuummi GUX-imi ilinniartut akornanni takornartaanngillat.

Viannguaq Olsvigip sikaritsit sunoorsinik taarsersimavai Assi © : KNR / Nukannguaq Kajusen

Viannguaq Olsvig siornatigut sikaritsinik pujortartarsimagaluarpoq, sunoorsit puussiaaqqat ullormut arfinillit pisarpai.

- Sila eqiagisalernikuugakku taava snusit toqqaannarakit, taanna oqarpoq.

Ilinniartup allap Jens L. Mathiassenip meeqqat atuarfianni 9. klasserlunili sunoorsertalerluni oqaatigaa.

Taassumalu sunoorsit aqqaneq marluk ullormut maanna pisarpai.

- Kikkut tamarmik aperiinnaraminnga snusit misilikkusunnerikka taava misilikkakkit uerisoorlungalu, taanna oqarpoq.

Sunoorseq puussiaaraq angivallaanngikkaluartoq ataatsimi 13 millegramimik nikotinitaqarpoq.

Tassa imaappoq sunoorsi puussiaaraq ataaseq sikaritsit 13-it missaannitulli nikotinitaqarpoq.

Qaratsamut kigutinullu innarliisinnaasoq

Naallu sunoorsit pujortartarnertulli puannut eqquineq ajoraluartoq meeqqat inuusuttullu sunoorsertarnerat qarasaannut innarliisinnaasoq misissuinerup takutippaa.

Tamanna Nakorsaaneqarfimmit Trine Abelsenip oqaatigaa.

- Inuusuttoq immaqa nikotinitortoq iluamik ilinniagasserisinnaanermut immaqaluunniit suliaqarsinnaanermut ajoqusiineq taavalu siunissami aamma tarnikkut nappaatinut qaninnerulertitsisinnaanera angsti, depressionimut qaninnerulertitsisinnaasarpoq taanna nikotinip sunniutai.

Naartusut pujortanngikkaluarlutik nikotinitortarnerat naartuumut aamma ajoqusiisinnaasoq Trine Abelsenip aamma nassuiaatigaa.

Tamanna naartuup mikivallaalerneranik, erniaarnermik meeqqalluunniit toqusoorneranik kinguneqarsinnaavoq.

Sunoorsertaraanni kigutit ikkillu ima isikkoqalersinnaapput Assi © : KNR / Nukannguaq Kajusen

Sunoorsilli ajoqutigisinnaasai taakkuinnaanngillat.

Sunoorsimmi kigutinut ikkinnullu aamma ajoqusiisinnaasut, Nuummi kigutigissaasup, Lene Heilmannip nassuiaatigaa.

- Takullattaartarpagut uani ameraasaani qaqortissimasoq taavalu aamma ameraasaa ikkialu innarlerneqartarpoq. Taavalu aamma kigutinut innarliisarpoq. Soorlu kigutit qaqorpallaarunnaarlutik taartillutik.

Inuusuttunut ersissutaanngitsut

KNR-illi ilinniartut oqaloqatigisaat marluk aperigaanni inuusuttut sunoorsertarunnaarnissaannut ersisaarutaasut annerusussapput.

Kigutigissaasumit assit ilinniartunut takutikkatsigit, siunissami sunoorsit unitsissallugit eqqarsarnersut aperaagut.

Assilli ilaannit neriuutigineqarsinnaasutulli unitsitsinissaannut kajumilersitsivallaanngillat.

Jens L. Mathiassenip sunoorsit aqqaneq-marluk ullormut pisarpai Assi © : KNR / Nukannguaq Kajusen

Sunoorsip sunniutigisinnaasaanik Vianannguaq Olsvig suli takusaqanngilaq, atuiunnaarnissaminillu takorluugaqannginnerarpoq:

- Eqqarsaatigineq ajorpakka taamaalissasut, uppererpiannginnakkit. Suli uanga taamaalinnginnamik, taanna oqarpoq.

Jens L. Mathiassenilu sunoorsertarunnaarnissaminik maannamut aamma pilersaaruteqanngikkallarpoq:

- Ija tassa unitsikkumaarpakka unitsinnialerukkit.