Tusagassiutit: Sapaatit- akunnerini qulingiluani imermik kuuginnartoqanngitsoq: Canadami nunaqarfik maanna ikiorneqalerpoq
Canadami Puvirnituq-imi innuttaasut ermup aqqutaata qerisimaneranik maanna sapaatit-akunneri qulingiluat qaangiupput paasitinneqaramik.
Ajornartorsiummulli tassunga suli aaqqiissuteqartoqanngilaq. Taamak tusagassiorfik Nunatsiaq allappoq.
Maanna Canadamiut spejderii – tuluttut rangersinik taaguuteqartut – nunaqarfimmut ikiuiartorlutik tikipput.
- Taakkua imermik assartuinermut, agguaassinermut allanillu pilersuinermut pingaarutilinnut, inuiaqatigiinnut oqilisaassiartorlutik ikiuukkiartorput, taamak Canadami nunamut illersornissaqarfiup immikkoortortaqarfiani oqaaseqartartoq Kened Sadiku Nunatsiamut oqarpoq.
Silap ajornarsisikkaa
Ajornartorsiut aaqqiiviginiarlugut pisortat ruujorimik 2,9 kilometerisut takitigisumik, kuussuup eqqaani milluaavimmiit nunaqarfimmi imermik saliisarfik tikillugu ikkussiniarsaripput.
Innuttaasut manna tikillugu kuussuarmiit imermik aallertariaqartarput, atorneqartinnagulu qalaateqqaagassaasarpoq. Silali pissutaalluni tamanna ajoornakusuulersimasoq Nunatsiaq allappoq.
Ermup ruujoriata aserornikortaa taarserumallugu Tuluit Nunaanniit kingoraartissarpaalunnik utaqqillutik Borgmesterip Lucy Qalingop Nunatsiamut oqarpoq.
