Nuummi kigutileriffik nutaaq sineriammi meeqqat kigutaasa narlorissartinnissaannik isumaginnissasoq

Nuummi qitiusumik kigutileriffik mikivallaaleqqavoq. Taamaammat naalakkersuisut ukiut tallimat iluanni nutaamik kigutileriffiliortoqarnissaa 2023-mi aalajangerpaat.

Suliniullu maanna aallartittoq, peqqinnissamut naalakkersuisoq, Agathe Fontain (IA) oqarpoq.

- Ukiorpassuanngortuni sanaliivikkaluartarluni unittoortarluni ilaa aningaasanik immikkoortitsinngitsoorneq peqqutaalluni. Taamaammat kisianni massakkut una isumaqatigiissut soorunami piviusunngortinnissaanut taanna pingaartikkakku naammassineqarnissaa naatsorsuutigilluinnarpara.

Nuummi kigutilerffik nunatsinni kisiartaalluni meeqqat inuusuttullu kigutaannik narlorissaasinnaavoq. Nunattalu sinnerani meeqqat kigutaat narlorissagassaappata narlorissarneqarsinnaannginnerat ukiorpassuarni isornartorsiorneqartarpoq.

Ajornartorsiulli tamanna isumaqatigiissummi nutaami pingaartinneqartoq, Agathe Fontain oqarpoq.

Nuna tamakkerlugu kigutinik narlorissaasoqartalernissaa anguniarlugu, Nuummi qitiusumik kigutileriffik nutaamik illutaarnissaa pisariaqartoq, taassuma nassuiaatigaa.

- Taanna isumalerujussuugami nutarsarsimanissaa aamma ukua avataaninngaanniit tikisitsillugu narlorissartittussat aamma inissaqartinniarutsigit.

Agathe Fontainip meeqqat sineriammiittut Nuummukarlutik kigutiminnik narlorsartikkiartorsinnaalersikkusuppai. Assi © : KNR / Johasinnguaq Olsen

20 millionit koruunit

Nuummi kigutinik narlorissaanermik neqeroorut ukiuni kingullerni politikkikkut aamma allanngortinneqartaraluarpoq. Maanna kigutinik narlorissaasarneq nuna tamakkerlugu periarfissaalernissaa ukiuni qulini tulliuttuni piviusunngorsimanissaa politikkikkut anguniagaavoq.

Nuna tamakkerlugu kigutinik narlorissaanermik neqeroorut naligiiffiulersinneqarnissaa ukiumut 20 millionit koruunit missaannik akeqassasoq misissuinerup takutippaa.

Naalakkersuisulli 20 millionit koruuninik pissarseriasaassagaluarunik ajornartorsiummik aaqqiissutaanavianngimmat Nuummi nutaamik kigutileriffiliornissaq aaqqiissutissatuaasoq, Agathe Fontainip oqaatigaa.

- Aningaasanilluunniit pissarsigaluarutta passunneqarnissaanut inissaqaratillu issiavissaqaratillu pippata taava taanna iluaqutaanngaarnaviannginnami, taamaattumik illutatigut taanna aamma pitsaasumik pitaarnissaq isumalerujussuuvoq.

Nuna tamakkerlugu kigutinik narlorissaasarnermik neqeroorutip pilersinneqarnissaa polikkikkut suliallit amerlanerussuteqartut siuartikkusuppassuk, naalakkersuisut taperseerusuttut, Agathe Fontain paasissutissiivoq. Tamannali aningaasanut inatsimmi aatsaat akuerineqaqqaartussaavoq.