Meeqqat Nuummiittut kisimik periarfissaqarnerat eqqumiippoq

Nunatsinni Nuuk kisimi meeqqat kigutaasa narlorissarnissaannut periarfissaqarmat naalakkersuisup eqqumiiginarnerarpaa. Taamaattoqartariaqanngikkaluarpoq, politikerit angajoqqaallu taama isumaqarput. Aaqqiissutissatulli tunngavissamik suli nassaartoqanngilaq.
- Tamanna eqqumiippoq, taamaattuminguna misissuisitsisunga taamaalilluta Inatsisartuni ajornartorsiutip qanoq ilillugu aaqqinneqarsinnaanera pillugu eqqartorsinnaaniassagatsigu, Mimi Karlsen oqarpoq.
Allattoq Karline Platou, Mads Malik Fuglsang Holm , Dorthea Reimer-Johansen
januaarip 13-at 2023 11:21

Piffissami kingullermi meeqqat kigutaasa nallorissarneqarnissaannut periarfissat killeqarnerujussuat oqallisaangaatsiarpoq.

Oqallinnermi qitiulluni meeqqat inuusuttullu Nuummi najugallit kisimik kigutaasa narlorissarneqarsinnaanerat taamaallaat periarfissaammat, tamannalu peqquteqarpoq kigutit nakorsaasa immikkut ilinniarsimasut killeqarnerat aammalu aningaasassaaleqissunneqarnerat.  

Sapaatip akunnerata siuliani Sakarine Olsen Müller KNR-mut oqarpoq pissutsit taamaaginnarpata ilaqutariillutik Danmarkimut nuunnialersaarlutik.

- Pingasunik qitornaqarpunga tamarmillu kigutaat narlorissarneqartussaapput tamannalu uagutsinnut kipiluttunarpoq. Maannalu uunga killippugut nuunnissarput pilersaarutigilerparput, Nuummuunngitsoq Danmarkimulli.

AAMMA ATUARUK Sakarine Olsen Müllerip meeraasa kigutaat narlorsartissinnaanngillat: Nuunnissarput pilersaarutigilerput

Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen (IA) KNR-mut oqarpoq tamanna pillugu maanna misissuisitsilluni misissuinerullu inernera utaqqigitsik.

- Siornali tamanna pillugu misissuisitsivunga naatsorsuutigaaralu qaammatip ataatsip iluani akineqarumaarlunga, taanna oqarpoq nangipporlu:

- Nammineq tamanna eqqumiiginartippara, taamaattumilluuna misissuisitsisunga inerneralu takkuteriarpat Inatsisartuni oqallisigissavarput ajornartorsiut qanoq ilillugu aaqqinneqarsinnaassanersoq.

Meeqqat inuusuttullu sinerissami najugallit Nuummi najugalinnut taamaaqatiminnut naleqqiullutik ajornarusumik kigutilerisoqarnikkut atugaqarput

Inatsisartuni politikerit akornanni arlallit kigutit narlorissarneqarnissaannut tunngatillugu Nuummi atugassarititaasut sinerissamut sanilliullugu pitsaanerunerat equngasutut isigaat, 

Taakkununnga ilaavoq Naleqqami siulittaasoq Pele Broberg. Taannami Mimi Karlsenimut sanilliulluni qanoq iliortoqarsinnaaneranik oqaasertaliineruvoq. 

- Periarfissat ilagisinnaavaat kigutit nakorsaat namminersortut sinerissamukartinneqarsinnaanerat, taanna oqarpoq ilanngullugulu siunnersuutigaa kigutit nakorsaat nunani allaneersut tikisinneqarsinnaagaluartut.

AAMMA ATUARUK Politikerit Nuummiinnaq kigutinik narlorissaasoqartarneranut: Nuup avataani aamma inuusoqarnera eqqaamaqqunaqaaq

Siumumiillu oqaaseqartartoq, Doris J. Jensen oqarpoq tamannna pillugu nutaamik eqqarsartoqartariaqartoq:

- Sisimiunilu angajoqqaat apersorneqartut angalasartussanik pilersitsisoqarsinnaanera taakkartorpaat, periarfissat tamakku politikkikkut misissorneqarnissaat kaammattuutiginarput, pingaartumik aningaasaqanermik ataatsimiititaliamiit naalakkersuisuniillu, taanna oqarpoq.

Siusinnerusukkut naalakkersuisuusimasoq naliliivoq nuna tamakkerlugu kigutit nakorsaanik atorfinitsitsisoqassagaluarpat tamanna 20 millioner koruuninik naleqartussasoq.

Aamma atuaruk