Politikerit Nuummiinnaq kigutinik narlorissaasoqartarneranut: Nuup avataani aamma inuusoqarnera eqqaamaqqunaqaaq

- Kaammattuutiginerusunnaqaaq paaseqqunaqalunilu Nuup avataani aamma inuusoqarmat, taannalu aamma kissaatiginaqaaq ingerlaannassasoq, Naleqqap siulittaasua Pele Broberg oqarpoq.

Taama oqaaseqaateqartoqarpoq, Nuup avataani meeqqat kigutaat narlorissarneqarsinnannginnerat pillugu KNR-mmi sapaatit akunerata aallartinnerani saqqummiunneqareersorlu.

AAMMA ATUARUK Sakarine Olsen Müllerip meeraasa kigutaat narlorsartissinnaanngillat: Nuunnissarput pilersaarutigilerput

Taamaammat Sisimiuni ilaqutariit ilaasa merartaasa kigutaat illoqarfigisaminni narlorissarneqarsinnaanngimmata Danmarkimut nuulersaarput. 

- Pingasunik meeraqarpugut, taakku kigutaat narlorissarneqassapput, ukiut marluk matuma siorna saaffiginnissutitta qisuariarfigineqannginnera pissutigalugu sukataaqqittariaqarnerput pakatsinarpoq, Sakarine Olsen Müller Sisimiuneersoq oqarpoq.

Ilaqutariiullutillu Danmarkimut nuunnissaat pilliuteqarfiungaatsiassasoq pissutsilli massakkutut itsillugit pisariaqartoq, taanna ilanngullugu oqarpoq. 

- Meeqqatta ulluinnaat, atuarnerat ikinngutaallu qimattariaqassavagut. Taakku pilliutigissavagut. Uagutsinnut angajoqqaajusunut illoqarfitta qimannissaa artornassaaq.

- Periarfissaqartuuppat maani illoqarfimmiiginnarusussagaluarpunga pisariaqartitatsinnillu ikiorneqarluta, Sakarine Olsen Müller oqarpoq.

Kigutinut nakorsassaalatsineq

Nuummimi meeqqat 5. klassimi atuartut tikillugit kigutaat pisortat akiligaannik narlorissarneqarsinnaapput.

Kigutinulli nakorsassaalatsisoqarnera peqqutaalluni tamanna nunatta sinnerani neqeroorutaanngilaq.

Ajornartorsiutilli tamatuma nunanit allanit tikisitsinikkut aaqqiivigineqassasoq, Pele Brobergip siunnersuutigaa.

- Ujartornikuuarput eqaannerusumik maanga nunatsinnut sualummik kigutinut nakorsat, nakorsat assigisaallu suliartorsinnaanerat. Taamaammat ujartornikuusarput unaavoq, qanoq ujartuisinnaanerluta assersuutigalugu Polenimiut kigutinut nakorsat maanga nunatsinnut qammarneqarsinnaanerat, taanna oqarpoq nangillunilu:

- Kisianni allat aamma qaqinnikuusagut ilagivaat, namminersortut tapiiffigalugit qanoq sineriammut ikiuutsissinnaanerigut ujartorneqartariaqarnerat. Maannakkumulli kisianni tassa pisortat kisimik ingerlatsiniarsarigaangamik iluatsitsisannginnerisa kinguneri massakkut takusinnaaleraluttuinnarpagut, Pele Broberg oqarpoq.

Siumup tamanna aamma naammaginnngilluinnaraa, Siumup politikkikkut oqaaseqartartua Doris J. Jensen oqarpoq.

- Nutaamik eqqarsartariaqarpugut kigutinimmi narlorsaasinnaasut killilimmik pigivagut. Sisimiunilu angajoqqaat apersorneqartut angalasartussanik pilersitsisoqarsinnaanera taakkartorpaat, periarfissat tamakku politikkikkut misissorneqarnissaat kaammattuutiginarput, pingaartumik aningaasaqanermik ataatsimiititaliamiit naalakkersuisuniillu, taanna oqarpoq.

Naalakkersuisut akissuteqaqqugai

Kigutinik narlorissaasarneq annertusarniarlugu innuttaasullu naligiimmik inissinniarlugit Naalakkersuisut pilersaaruteqarnersut, Inatsisartuni ilaasortaq Siumumeersoq, Doris J. Jensen, Naalakkersuisunut apeqquteqaateqarpoq, taassumali Naalakersuisunit akissutinissi utaqqivaa.

Nuummiuinnaat taamatut periarfissaqartinneqarnerat akuersaaruminaattoq immikkoortitsinerusorlu, taanna isumaqarpoq. Taamaammat taassuma Naalakkersuisut akissuteqaqquai.

- Tamanna soorunami akuersaaruminaappoq. Taamaammat naalakkersuisunut apeqquteqaateqarpunga, tamatuma aaqqiivigineqarnissaa pillugu naalakkersuisut takorluugaqarnersut, tassa naalakkersuisuninngaanniit innuttaasut naligiimmik periarfissinniarneqarnersut, taanna oqarpoq.

Allaat ilaasa nunarput qimallugu nuulersaarnerannik kinguneqartumik nunaqqatitta kigutaasa narlorsarneqarsinnaannginnerat assuarnartoq, Doris J. Jensen isumaqarpoq.

- Ajuusaarnartorujussuuvoq nunatsinni innuttaqatitta kigutaasa narlorsarneqarsinnaannginnerat, allaat ilaasa nunarput qimallugu Danmarkimut nuuttoqartariaqarluni, Doris J Jensen oqarpoq.

Peqqissutsimut naalakkersuisoq, Mimi Karlsen, oqaaseqartinniaraluarparput, tamannali pillugu aatsaat sisamanngorpat oqaaseqarnissaminut periarfissaqarluni ilisimatitsivoq.