Nunatsinni aalasulianik pinngorartitsivittut sulliviit siullersaat ammarneqalersoq
Aalasulianik pinngorartitsivittut sullivik Namminersorlutik Oqartussanit Kommuneqarfik Sermersuumiillu tapiiffigineqarluni FILM.gl-imit pilersinneqarpoq, filmiliortorlu Marc Fussing pikkorissaasoralugu pikkorissaaneq siulleq decembarip aqqaneq-aappaani aallartissaaq.
- Aalasulianik pinngorartitsivittut sullivik tassaassaaq nunatsinni filmiliortut inuusuttut inuussutissarsiutigalugu filmiliortartunit ikiorneqarlutik filmiliornissamut isumassarsiaminnik piviusunngortitsinissaannut aqqutissiuisussaq, inuusuttullu filmiliornerup iluani suliaqarnissamut aqqutissanik allanik isumassarsiorfigisinnaasassaat, aalasualianik pinngorartitsivittut sullivimmi ulluinnarni aqutsisoq, Karsten Heilmann, taama allappoq imalu nangilluni:
AAMMA ATUARUK Isiginnaagassiorfik kiisami aningaasannattoq
- Nunatsinni filmiliorneq ineriartorfiujuassaaq, filmiliortullu pikkorissut amerlanerulernissaat aamma pingaaruteqarpoq. Killuisartut, assiliisartut, qullilerisut, nipilerisut ilitsersuisartullu amigaatigineqarput. Aalasulianik pinngorartitsivittut sullivik tassaassaaq paasisimasalinnit ilitsersorneqarluni pinngorartitsinikkut pinnguartarfik filmilioriaatsimillu piginnaasanillu inerisarfiusussaq, Karsten Heilmann erseqqissaavoq.
Teknikkikkut ikiorneqarnissamik suliniutinullu aalajangersimasunut ikiorneqarnissamik aalasulianik pinngortitsivittut sullivimmut januaarip qaammataani qinnuteqaateqartoqarsinnaalissaaq, aamma suliniutissat arlallit piareersarneqalereerput, Nunavumi Europamilu sulliviit assingusut suleqatigalugit piginnaasanik inerisaaneq ingerlanneqassalluni.
AAMMA ATUARUK Naak aningaasaatigut?
