Isiginnaagassiorfik kiisami aningaasannattoq
Filminik suliaqartarfiup aallartinnissamut aningaasat utaqqisai, Nuummi isiginnaagassiorfissap kiisami pissarsiarai.
Tamanna filminik suliaqartarfimmi, Film.GL-imi siulittaasup, Pipaluk K. Jørgensenip nuannaarutigaa:
- Taperserneqarneq kiisami iluatsittoq nuannaarutigingaarparput. Tamanna piffissami sivisuumi utaqqisimavarput suliarujussuarlu kiisami piviusunngorsinnaalerpoq.
Inatsisartut ukiaq 2017-imi aningaasanut inatsimmi 3,5 millionit koruunit eqqumiitsuliornermut kultureqarnermullu immikkoortippaat. Aningaasanit taakkunannga 1 millionit koruunit isiginnaagassiorfissamut atorneqartussaagaluarput.
Aningaasalli tunniunnissaat upernaaq qinersisoqarnera pissutigalugu unittoorput, isiginnaagassiornermillu suliaqarfiup Film.GL-ip aningaasat neriorsuutaasut takunngilai. Isiginnaagassianik suliaqarfik marsimi ammarsimasussaagaluartoq unittoorpoq.
AAMMA ATUARUK Naak aningaasaatigut?
Kultureqarnermut naalakkersuisup, Ane Lone Baggerip aningaasanut inatsimmik aningaasat oktobarimi qinnutigisineqarsinnaanersut tallimanngormat nalunaarutigaa, Film.GL-illu 1 millionit koruunit pissarsiarisimallugit tallimanngornermi nalunaarutigaa.
Taamaammat isiginnaagassianik suliaqarfiup inuusuttut isiginnaagassialerinermik piginnaasaqartut qaaqquneqarsinnaangajalissagai, Pipaluk K. Jørgensenip oqaatigaa.
- Neriuppugut matut decembarip aallartinnerani ammarsinnaassallutigit. Assigiinngitsualuillu aatsaat suliarilikkagut aatsaat aallartilerpagut.
Isiginnaagassiortarfik 850.000 koruuninnappoq, aningaasallu sinneri 150.000 koruunit kalaallinut isiginnaagassiornermik suliaqartunut tapersiissutissatut ingerlatinneqarlutik. 2018-imut aningaasanut inatsimmit aningaasannannermi saniatigut isiginnaagassiortarfik Kommuneqarfik Sermersuumiit aamma 850.000 koruuninnappoq.