Film.gl: Naak aningaasaatigut?

- Qangarsuarli ammareertussaagaluarparput, ammarnissaanulli aningaasat maanna amigaatigivagut, film.gl-ip siulittaasua Pipaluk K. Jørgensen oqarpoq.
 
Filmiliortartunngorumaartussat filmiliornermut sungiusaatissaannik atortorissaarutinik pisinissamut 1 million koruunit Inatsisartunit aningaasaliissutigineqareeraluarput, aningaasaliissutigineqartulli suli tunniunneqanngillat.  

Aningaasaliissutillu amerlineqarnissaat politikerinit siorna aalajangerneqarmat nunatsinni kulturilerisut akornanni nuannaarutigineqaraluarpoq.

AAMMA ATUARUK Film.gl siunissami filmiliortartussarsiortoq

Atuakkiortunut, isiginnaartitsisartunut, nipilersortartut kiisalu filmiliortartunut 3,5 millionit koruunit aningaasaliissutigineqarput.

Kultureqarnermut naalakkersuisoqarfik naapertorlugu, aningaasat aningaasaqarnermut naalakkersuisoqarfimmit nuunneqarnissaat qinnuteqaatigineqaraluarpoq, Inatsisartunulli qinersisoqarnerata tamanna pisinnaajunnaartippaa.

- Massakkut aningaasat sumiiffianiittut nuunneqassappata, Naalakkersuisut tamarmiullutik akuerisussaavaat. Tassa imaappoq Naalakkersuisut akuerereerpatigit aningaasaqarnermut ataatsimiititaliami aamma akuerineqarpata tassa nuunneqassapput, Namminersorlutik Oqartussani kultureqarnermut siunnersorti Mika Lyberth taama oqarpoq.

AAMMA ATUARUK Grønland sætter sig i spidsen for ny arktisk filmfond

Filmileriffiullu qanittukkut ammarnissaanut periarfissaqalinngippat, tamatuma nunatsinni filmiliortarnermut kingunerlutsitsisinnaanera Film.gl-ip ernumassutigaa.  

- Kalaallit filmiliortartut, filmiliornermullu tunngatillugu kulturilerisut eqqumiitsuliortullu ammaasinnannginnerput pissutigalugu sumiginnassavagut, Pipaluk K. Jørgensen taama oqarpoq.

Eqqumiitsuliortunullu sivisoorsuarmik utaqqisinneqartunut aningaasaliissutigineqartut qanittukkut tunniunneqarnissaat Kultureqarnermut, Ilinniartitaanermut Ilageeqarnermullu naalakkersuisoqarfiup neriuutigaa.