Nunarput isiginnaagassiornermut aningaasaateqarfimmi nutaami siuttortaqalersoq

Isiginnaagassiornermut aningaasaateqarfiup pilersinneqaqqammersup ’Arctic Indigenous Film Fund’-ip siulersuisussani siulliit toqqaqqammerpai.
kuupik V. Kleist
kuupik V. Kleist Assi © : KNR/Marie Kristensen
maajip 11-at 2018 14:13

Matumanilu Naalakkersuisuni siulittaasuusimasoq, Kuupik V. Kleist siulittaasutut inissittoq, nittartakkatigut nutaarsiassaqartitsivik, Screen Daily allappoq.

Isiginnaagassiornermut aningaasaateqarfik The International Sami Film Institutep Norgemeersup Greenland Film makersimik – tassa FILM.GL-imik aamma Canadamit, Nunavumit Ruslandimiillu filmiliortartunik suleqatiginninneratigut ukioq manna marsimi pilersinneqarpoq.

- Arctic Indigenous Film Fundimi siulersuisugut siulliit Issittumi sumiiffinnit tamaneersut isiginnaagassiornermut issittumilu kulturi pillugu piginnaasaqarluartut taama amerlatiginerat tulluusimaarutigaarput, The International Sami Film Institutep pisortaa, Anne Lajla Utsi Screen Dailymut oqarpoq.

Isiginnaagassiornermut aningaasaateqarfik ineriartortitsinissamut isiginnaartitsissusiornissanullu tapertaasussatut kiisalu issittumi isiginnaagassiornermik suliaqartut assigiinngitsut nunap inoqqaavisa kulturiisa oqaasiisalu siuarsarnissaat pillugu isiginnaagassianik suleqatigiinnerannik nukittorsaataasussatut pilersinneqarpoq.

Siulersuisunut ilaasortat allat ukuupput: Film & Music Entertainmentimi pisortaq isiginnaagassiortorlu Mike Downey; Norgemit Arctic Arts Festivalimi pisortaq Maria Utsi; Norgemiu isiginnaartitsisartut isiginnaagassiortartorlu Nils Gaup; Russeq isiginnaagassiortartoq, Sardana Savvina; Canadamilu Nunavut Film Development Corporationimi pisortaq, Huw Eirug.