Nunat allamiut aningaasaliisinnaanerat KNAPK-mit tikilluaqquneqartoq
- Pituttorsimanngitsumik aningaasaliiniarnerit ujarneri ajornakusooramik maannakkut, taamaattumik avataaninngaaniit periarfissanik allanik saqqummertoqarsinnaappat taanna ajoqutaanavianngilaq, Tønnes Kaka Berthelsen oqarpoq.
Sinerissammi qanittuani aalisartut nunatsinni aningaasaliisinnaasunik saaffigisinnaasaat ikittuinnaapput.
Aningaaseriviit marluk kilisaataatileqatigiiffiillu angisuut aalisariutinut nutaanut aningaasaliisinnaapput.
AAMMA ATUARUK Aalisarnermut ataatsimiititaliarsuassaq iluatsinngitsuussaaq
Kiisalu Namminersorlutik Oqartussat aalisarnikkut ineriartortitsinissamut aningaasaliissutigisartagaat maanna ukiumut 14 millionit koruuniusut sinerissap qanittuani aalisartut aalisariutimik taarsernissaannut tapiiffigineqarnissaminnut qinnuteqarsinnaapput.
AAMMA ATUARUK Aalisarnermut ataatsimiititaliarsuaq nersoraat
KNAPK-p misissuigami paasivaa, aalisariutit akunnattumik angissuseqartut nutaanngilivallaalersimasut.
- Aalisariutit ima nutaanngilisimatigipput nutaanik taarsersortariaqarlutik, maannakkullu inuiaqatigiit pilersaarummik peqanngilagut, qanoq lliussanerluta, taamaattumik aningaasaliisussanik ujarlerneq pisariusarpoq aalisartumut, Tønnes Kaka Berthelsen oqarpoq.
Taassuma nunat allamiut aningaasalisartuisa Kalaallit Nunaanni aalisarnermik tiguaanissaat ernummatiginngilaa.
AAMMA ATUARUK Jeremiassenip aalisarnermut ataatsimiititaliarsuassap suliarinera saqqummiunneqartoq uppernarsaraa
Inatsimmi erseqqarereersoq taanna isumaqarpoq, aalisarnermullu inatsit 1996-imeersoq, tassa iluarsaanniarneqartorpiaq, innersuussutigalugu. Inatsimmimi maanna atuuttumi allaasimavoq, angallatit raajarniutit nunatsinneersunit tamakkiisumik pigineqassasut, taannalu allanngussangatinngilaa.
Inatsilli aalisariutinulli allanut taama piumasaqaatitaqanngilaq, taakkuami 33 procentii kalaallinit pigineqarnissaat piumasaqaataaginnarpoq. Tønnes Kaka Berthelsenip 2011-imi avaleraasartoorniarnerup aallartinnerani misilittakkat aamma innersuussutigai.
AAMMA ATUARUK Aalisarnermut ataatsimiititaliarsuaq nersoraat
Taamanikkut kalaallit avaleraasartorniartut nunat allamiut aalisariutaannik attartortariaqarsimapput.
- Aap kisianni eqqumajuassaagut, ukua pisassiissutinik taaneqartartut kvoter, taakkua kalaallinit pigineqarnissaat pisinnaasaq tamaat napertorlugu qulakkeerniartariaqarparput, Tønnes Kaka Berthelsen oqarpoq.
AAMMA ATUARUK Avaleraasartuut suli ikiliartorpasittut