Aningaasaqarnermut Siunnersuisoqatigiit: Aalisarnermut ataatsimiititaliarsuaq nersoraat
![](/sites/default/files/styles/image_934x467/public/article_images/img_7157.jpg?itok=O72ldH4t)
![](/sites/default/files/styles/image_934x467/public/article_images/img_7154.jpg?itok=6MggDC4H)
![](/sites/default/files/styles/image_934x467/public/article_images/img_7153.jpg?itok=zn7jsEb3)
- Ataatsimiititaliarsualiortoqarnissaanik aalajangertoqarnera ajunngilluinnartutut isigaarput. Aalisarnermut inatsisissap suliarilluagaanerata paasissutissiissutigilluarneqaneratalu politikkikkut siammasissumik taperserneqarnissaa taamaalilluni aqqutissiuunneqassammat, Aningaasaqarnermut Siunnersuisoqatigiit siulittaasuat Torben M. Andersen oqarpoq.
Siunnersuisoqatigiit 2018-imut nalunaarusiartik piareereeraallu nutaanik naalakkersuisoqatigiiliortoqarpoq. Nutaanik naalakkersuisoqatigiiliortoqarneranit aalisarneq pillugu inatsisissamut ataatsimiititaliorsualiortoqarnissaa siunniunneqarpoq.
Taamatuttaaq inatsisissap Inatsisartuni suliarineqarnissaa upernaarumut kinguartinneqarpoq.
Andersen: Sangujoraarneq avaqqunneqartariaqarpoq
Ataatsimiititaliorsualiortoqarneranit politikkikkut tamakkiisumik tapersiisoqarnissaa aqqutissiuunneqartoq inatsisissarlu suliarilluarneqassasoq Torben M. Andersen naliliivoq.
- Taakku pingaaruteqartorujussuupput, aalisarnermi Kalaallit Nunaata pingaarnerpaatut aningaasarsiorfigaa. Taamaammat tulluartumik inatsisiliuunneqartariaqarpoq, inatsillu allanngorneqassatillugu siammasissumik taperserneqartariaqarluni. Taamaalilluni qinersisoqareertillugu inatsisip allanngortinneqaqattaarnissaa pinngitsoortinneqassammat, oqarpoq, nangipporlu:
- Sangujoraartoqassappammi inuussutissarsiuummut naleqqutinngilaq. Inatsimmik ataavartumik peqanngippat nalornilersitsinermik kinguneqassaaq taamaalillunilu siumungaaq pilersaarusiorniarnermut ajornakusoortitsissalluni. Taamaammat inatsit politikkikkut siammasissumik taperserneqarnissaa pingaartupilussuuvoq.