Jeremiassenip aalisarnermut ataatsimiititaliarsuassap suliarinera saqqummiunneqartoq uppernarsaraa
Aalisarnermut, piniarnermut nunalerinermullu Naalakkersuisup, Nikkulaat Jeremiassenip (S) aalisarnermut ataatsimiititaliarsuassap sulinerani sinaakkutit, tusagassiuutinut saqqummiunneqartut nassuerutigaa.
Tamanna KNR-imut uppernarsarpaa.
Ataatsimiititaliarsuassap sulinera pillugu oqallisaarut KNR-imut Sermitsiamullu tallimanngormat saqqummiunneqarpoq, allakkallu uppernarsaatit Ilulissani isumaqatigiinninniarnermit pisortatigoortumik saqqummiussaasut aatsaat ataasinngornermi uppernarsarneqarpoq.
Taamaalilluni Nunatsinni inuussutissarsiornermi pingaarnerpaaq pillugu isumaqatigiinniarnerit matoqqalluinnartut iluanni susoqarnersoq paasisaqarfigaarput.
AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq
Ataatsimiititaliarsuassap misissugassarisaani siunnersuutit annertuut marluk tassaapput:
“ Piffissamik killiligaangitsumik raajartassiissutit utertinneqarsinnaanerat inatsisartut inatsisat atorlugu pitsanngorsaavigineqarsinnaanerat, sivikinnerpaamik ukiut tallimat sioqqullugit nalunaarutigineqarnissaat”
Aalisarnermullu ataatsimiititaliarsuassap iluaqutit ajoqutillu misissussagai aamma ilaasussatut siunnersuutigineqarpoq:
- Kitaani raajartassiissutigineqartartut 43/50-nit 50 procentinut allanngortinneqarnissaa
Sinerissap qanittuani raajartassat 50 procentinnngortinneqarlutik kiisalu avataasiortut raajartassaat 50 procentinngortinneqarlutik.
Suli allannguuteqangaatsiartoqarsinnaasoq
Naalli ataatsimiititaliarsuup saqqummiussai maanna uppernarsarneqaraluartut siunnersuutit ilumut suliap nassuiarnerani ilaatinneqassanersut suli qulakkiivinneqanngitsoq erseqqissassallugu pingaaruteqarpoq.
Nikkulaat Jeremiassenip KNR-ip raadiukkut aallakaatitaani Inuiaat Tillernerani tallimanngornermi ualikkut apersorneqarnerani tamanna erserpoq.
- Taavalu ilassutissat allannguutissaasinnaasullu, massakkut Aalisarnermut Naalakkersuisoqarfimmi suliarineqarput, taakkualu naammasseriarpata Naalakkersuisunut saqqummiunneqassallutik, Nikkulaat Jeremiassen KNR-imut oqarpoq.
AAMMA ATUARUK Aalisarneq pillugu ataatsimiititaliarsuaq suli pilersinneqanngitsoq
Taassuma isumaqatigiinnermit missingersuut sapaatip akunnerani matumani Naalakkersuisunut saqqummiunneqarnissaa suliarineqarnissaalu naatsorsuutigaa.
Tamatuma kingorna aalisarnermi inuussutissarsiornermi peqataasut assigiinngitsut illuatungiliuttullu
Missingiussaq Naalakkersuisunit akuerineqarpat aalisarnermut attuumassuteqartut tamarmik partiillu illuatungiliuttut ataatsimiititaliarsuup sulineranut ilanngussinissaat pilersaarutaavoq.
Tamanna naammassippat sulineq Naalakkersuisunut utissaaq, nutaamillu suliassaq nassuiarneqarluni nutaanik ilalerneqassaaq.
AAMMA ATUARUK Partii Naleraq vil have Jeremiassen i samråd
Aalisarnermut ataatsimiititaliarsuassaq qasseeriarluni kinguaattooreerpoq. Paasissutissat nutaat naapertorlugit piareernissaanut suli piffissangaatsiaq atorneqassaaq.
Aalisarnermut ataatsimiititaliarsuassap matoqqasumik suliarineqarnera pissutigalugu Nikkulaat Jeremiassen isornartorsiorneqarnikuuvoq.