Aalisarnermut ataatsimiititaliarsuaq Jeremiassen isumasiorneqarnissaanut Partii Naleqqap aggersarniaraa

Aalisarnermut Naalakkersuisup nassuiaateqarnissaa anguniarlugu isumasioqatigineqarnissaanik Partii Naleraq piumasarpoq.

Suleqatigiissitsisut partiiannit ilimatsaassutigineqarpoq, Naalakkersuisoqatigiit taakkualu partii tapersersortaasa akornanni aalisarneq pillugu ataatsimiititaliarsuassap siunertaa pillugu isumaqatigiinngissuteqartoqartoq.

- Soorluuna aalisarneq pillugu ataatsimiititaliarsuassap inuttalersorneqarnissaa taassumalu suliassai pillugit isumaqatigiissutigineq ajuleqqagaat, Tillie Martinussen, Suleqatigiissitsisut Partiiat sinnerlugu inatsisartuni ilaasortaq taama oqarpoq.

AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq

Taassuma IA aamma Partii Naleraq assigalugit, Inatsisartuni partiit, aalisarnermullu inuussutissarsiuteqartut sinniisaat peqaatinneqarnissaat ujartorpaa.

Tamannami pinngippat, aalisarnermut inatsisissap nutaap suliarineqarnera isumaqatigiinnginnermik kinguneqarsinnaammat.

Taamaattumik nunatsinni aningaasarsiorfiit pingaarnersaat pillugu sinaakkusiornissamut isumaqatigiissuteqarnissaq pisariaqarpoq: 

- Inuussutissarsiuteqartuni eqqissiviilliunnginnissaq atorfissaqartipparput, ungasinnerusoq eqqarsaatigalugu  aningaasaliisoqarnissaq atorfissaqartipparput. Aamma aalisarsinnaanermut akuersissutinik agguaasarneq KNAPK-lluunniit allaat isornartorsiorpaa, Tillie Martinussen oqarpoq.

AAMMA ATUARUK Aalisarneq pillugu ataatsimiititaliarsuaq suli pilersinneqanngitsoq

Aalisarneq pillugu ataatsimiititaliarsualiassaq pillugu Naalakkersuisut matoqqanerat Partii Naleqqap siulittaasuata Hans Enoksenip illuatungiliuttut assigalugit pakatsissutigaa. 

Taassuma Aalisarnermut Naalakkersuisoq Nikkulaat Jeremiassen isumasiorneqarnissaanut aggersarniarpaa.

- Taassuma piaarnerpaamik suliarineqarnissaa aallartissavarput, taamaalilluni paasissutissat suunukua isertuunneqartut  qulaarneqarsinnaaneri qaninnerulersinnaammat, Partii Naleqqami siulittaasoq, Hans Enoksen oqarpoq.

AAMMA ATUARUK Aalisarneq pillugu ataatsimiititaliarsuaq pillugu Ilulissani isumasioqatigiittoqalersoq