Suleqatigiissitsisut Aalisarnermut ataatsimiititaliarsuassaq iluatsinngitsuussaaq
Aalisarneq pillugu ataatsiimiititaliarsuassap suliarineqarnerani Naalakkersuisut kukkusinnaapput
Tillie Martinussen Suleqatigiissitsisut partiianneersoq taama oqarpoq.
AAMMA ATUARUK Jeremiassenip aalisarnermut ataatsimiititaliarsuassap suliarinera saqqummiunneqartoq uppernarsaraa
- Naalakkersuisut Aalisarnermut ataatsimiititaliarsuup qanoq ittuunissanik pilersaarutitik pillugit amerlanerussuteqarniarsaripput, illuatungiliuttunit aamma inuussutissarsiutinik ingerlataqartunit, aningaaliisartunit immikkut ilisimasalinnit aalisartuniillu nipiliortoqarnera pissutigalugu soorluuna peqataatinneqarsimasutut-inniassammata pisuusaartut.
Taanna taama oqarpoq, Aalisarnermut Piniarnermut Nunalerinermullu Naalakkersuisup Nikkulaat Jeremiassenip neriorsuinerata kingorna, tassalu illuatungiliuttut taamatullu aalisarnermik ingerlataqartut ataatsimiititaliarsuup sulinerani ilanngussinissaannik periarfissinneqarumaartut.
Tamannalu aatsaat pisinnaavoq, ataatsimiititaliarsuup sulinissaanut missingiussaq naalakkersuisut naammassippassuk, tamatumalu kingorna illuatungiliuttut aamma inuussutissarsiutinik ingerlataqartut, piffissaligaanngitsumik ataatsimiititaliarsuarmut ilanngussisinnaanerannik, tamatumali kingorna aalisarnermik ataatsimiititaliarsuaq aatsaat suliarineqarsinnaalerluni.
- Suliaq tamaanga killereersoq kingusippallaarpoq, aamma kinguneqartussatut iluarsineqarsinnaalluarpoq.
Periutsimik ajortumik atugaqartoqalerpoq, attuumassuteqartut aamma isornartorsiuteqartut tusaaniarnerat ajornakusoortinneqarluni.
Taassuma ilanngullugu oqaatigaa, aalisarnermut ataatsimiititaliortoqarnissamut suli qaaqqusissummik tigusaqarsimanatik
naak aalisarnermut naalakkersuisoq Nikkulaat Jeremiassen neriorsuigaluartoq sapaatip akunerani uani missingiussaq piareerumaartoq.
Ataatsimiititaliarsuassap suliassaatut missingiussaq tamanut saqqummiunneqaqqusaanngitsoq tusagassiortunut tunniunneqarpoq.
AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq
Siunnersuutit marluk maluginiagassaapput, tassalu ataatsimiititaliarsuassaq misissuinissaanut periarfissinneqassaaq killiligaanngitsumik raajartassiissutit atorunnaarsillugit ukiunut tallimanut atuuttussanngortinneqarnissaannut.
Aalisarnermut Ataatsimiititaliarsuanngortussap aamma misissortussaavaa, kalaallit nunaata sineriaani qanittumi raajartassat maannakkut 43 procentiusut kiisalu avataasiortunut raajartassat 57 procentiusut aveqqissaarlugit, tassalu tamarmik 50 procentinik raajartassinneqartalernissaat misissortussanngorpaa.
Pissutsit tamakku misissorneqarnissaat Tillie Martinussenip iluarisimaarpaa, taamaattorli naalakkersuisut inuussutissarsiortunik aallaqqaammulli peqataatitsinginnerat amigaatigalugu.
AAMMA ATUARUK Aalisarneq pillugu ataatsimiititaliarsuaq suli pilersinneqanngitsoq
" Isumaqarpunga pingaaruteqartuusoq, ataatsimiititaliarsuup sulinissaata tamakkiisumik inissinneqarnissaa sioqqullugu amerlanerpaanik ilanngussisoqarnissaa isumagineqartariaqartoq.
Suliassaq saqqummiunneqarnermisut pingaaruteqarpoq, soorlu aamma naammassineqarnissaa taamaattoq.
Aalisarnermut ataatsimiititaliarsuassaq suliakkiutigineqartut naapertorlugit sulisussaavoq, Tillie Martinussen Suleqatigiissitsisut Partiianneersoq taama oqarpoq.
KNAPK, Sulisitsisut GE aamma IA KNR-imit oqaaseqartinniarneqaraluarput tamannali iluatsissinnaasimanngilaq