Avaleraasartuut suli ikiliartorpasittut
Biologit atlantikup avannarpasissuani avaleraasartuut amerlassusii pillugit misissuiartoramik misissuinerata qanoq inerneqarnissaanut ilimasulereersimasut, Pinngortitaleriffimmi ilisimatooq, Teunis Jansen oqarpoq.
- Inerneri ajoraluartumik pakatsinarput, tamannalu ilimagereerparput. Tassalu avaleraasartuut ukiuni kingullerni ikiliartoreerlutik suli ikiliartorpasipput, Teunis Jansen oqarpoq.
Avaleraasartuut ukuini tulleriiaani aalisapilunneqartarnerat ikiliartornerannut pissutaaqataasoq, ilisimatooq oqarpoq, nassuiaatigalugulu, Imavinni Misissuinerit pillugit Nunat Tamalaat Siunnersuisartoqatigiiffiata, ICES-ip, atlantikup avannaata kangiani 2018-imut avaleraasartoortassat katillugit 550.000 tonsit missaanniinnissaat inassutigigaa.
"Piujuaannartitsinerusumik aalisarnerunngilaq"
Sumiiffimmili ukiumut 1 millionit tonsit missaat ukiuni kingullerni aalisarneqartartut, Jansen oqarpoq.
- Namminersorlutik Oqartussat illorsuat, illorsuup pisiniariartortarfii ilanngullugit avaleraasartuunik taama amerlatigipajaartunik tyveriarluni ulikkaarneqarsinnaavoq, ilisimatooq oqarpoq, nangillunilu:
- Uagullu naatsorsuinerput naapertorlugu, tamanna piujuaannartitsinerusumik aalisarnerunngilaq. Ukiunilu arlaqartuni taamaareerpoq, Teunis Jansen oqarpoq.
Aalisapilunnermulli nunatsinni aalisarneq minnerusumik pisuusoq, taassuma erseqqissaassutigaa.
- Kalaallit Nunaanni aalisarneqartartut 30.000 tonsit 70.000 tonsillu akornanniigajupput. Taakkulu ukiuni tallimani kingullerni katillugit aalisarneqartartunut ukiumut 1 millionit tonsit 1.4 millionit tonsillu akornanniittunut sanilliullugit amerlanngillat, Teunis Jansen oqarpoq.
AAMMA ATUARUK Tunup imartaani avaleraarsartooqarluarpoq
AAMMA ATUARUK Tunup avataani avaleraasartooqannginnerusoq
Aalisapilunnerli avaleraasartuut ikiliartornerannut pissutaasuni kisimiinngitsoq, taanna nassuiaavoq.
- Avaleraasartuut ikinnerunerannik taavalu upernaap aasallu nillernerat pissutaagunarlutik avannaata-kitaanukartoqarpallaanngilaq. Taamaammat Islandip kujataani Kalaallit Nunaatalu imartaani nassaagut ukiuni kingullerni nassaatsinnit ikinnerupput, Teunis Jansen oqarpoq.
AAMMA ATUARUK Avaleraasartuut ukiormanna ikinnerunerinut nassuiaatissaq aana
Tunumi avaleraasartuunik aalisarlualeruttortortoqarnerata nalaani avaleraasartuut ikilinerannik biologit inerniliussaqarput. Kalaallilli aalisartuisa avaleraasartuunik aalisallaqqinnerulersimanerannik tamanna takussutissiineruvoq, avaleraasartuut amerlisimanerannut takussutissiinani, Teunis Jansen oqarpoq.
AAMMA ATUARUK Avaleraasartoorniarneq siuariarfiusoq
Biologilli qanoq siunnersuiumaarnersut oqaatigissallugu siusippallaartoq, taanna oqarpoq, ineriartornerli ersarittoq oqaatigaa.
