Tunup avataani avaleraasartooqannginnerusoq
Tunup avannaaniit kujammut nunap isuata kujataa ilanngullugu Tunup avataani avaleraasartooqassutsimik misissuinerup inernerigallagaata tamanna paasinarsisippaa.
Pinngortitaleriffik tusagassiorfinnut nalunaarummini taama allappoq.
Atlantikup avannaani katillugit pisassiissutaasartunit Nunatta qanoq amerlatigisunik pisassinneqarsinnaanerminut piumasaqarnissaanut paasissutissat tamakku aalajangiisuusussaassapput.
Tamaani avaleraasartooqassutsip ikileriarneranut pissutaasinnaasutut Pinngortitaleriffimmit oqaatigineqarpoq, avaleraasartuut Tuluit qeqertaasa kitaatungaanni suffisarfimminniit avannamut kimmut ingerlaalersarnerisa upernaaq manna immap nillerpallaarneranik pissuteqartumik kingusinnerunerannik pissuteqarsinnaasoq.
AAMMA ATUARUK Avaleraasartoorniarneq suli pisaqarfiuvallaanngilaq
Nunatta sineriaani avaleraasartooqassutsimik misissuinerit, misissuinerit assingusut Norgemi, Savalimmiuni Islandimilu ingerlanneqartut ataqatigiissaareqatigalugit ingerlanneqarput. Uumassusilerisut nunanit taakkunannga sisamaneersut misissuinerni paasisat suliarileruttorpaat, taakkulu Københavnimi aggustip naanerani tamanut saqqummiunneqartussaapput.
Tunup avataani avaleraasartooqassutsimik misissuineq Atlantikup avannaa tamakkerlugu avaleraasartooqassutsimik misissuinermut tamarmiusumut ilanngunneqassaaq. Taamatut ataatsimoortumik peqassutsimik misissuisunut Pinngortitaleriffik peqataatitaqarpoq.
2016-imi avaleraasartoortassatut ICES-imit innersuussutigineqartut oktobarip aallartinnerani saqqummiunneqartussaapput.