Avaleraasartoorniarneq suli pisaqarfiuvallaanngilaq

Tunup avataani ukiormanna avaleraasartoorniarneq suli pisaqarfiuvallaanngilaq, ilaatigut Polar Seafoodimi siulersuisut siulittaasuat Henrik Leth aviisimut Sermitsiamut taama oqarpoq.
Assi © : Kenneth Dahl
Allattoq Karsten Sommer
juulip 31-at 2015 09:52
Nutserisoq Simon Uldum -

- Maannamut ingerlalluarpallaanngilaq. Suli aalisarnerput iluamik aallartinngilaq, Leth aviisimut taama oqarpoq.

Sila imaata kiassusia tamatumunnga pissutaanerarpai.

- Imaata kiassusia siorna piffissap taamaalineranut naleqqiullugu nillerneruvoq, taamaammat aamma avaleraasartuut ikinnerupput.

Kalaallit Nunaanni Aalisarsinnaanermut Akuersissutinik Nakkutiliisoqarfimmi pisortap tulliata Niels J. Lauersenip tamanna ilumoornerarpaa.

- Pisassiissutinit 85.000 tonsiusunit maannamut 9.790 tonsit pisarineqarput, siorna piffissap taamaalineranut naleqqiullugu 20.000 tonsinik ikinnerullutik.

AAMMA ATUARUK Ukiormanna avaleraasartoorniarneq aallartinniaasaartoq

Ataasinngormalli ukiormanna aalisarnermi aatsaat taama pisaqartigisoqarpoq - ukiormanna avaleraasartoorniarnermi angallatit peqataasut 17-iusut ulloq taanna katillugit 920 tonsit pisaraat.

Taamaammat avaleraasartoorniat tamanna aalisarnermut pisaqarfiulluartumut aallarniutaanissaa neriuutigaat maannamut kinguaattooqqarnermikkut angummakkumallutik, aviisi taama allaaserisaqarpoq.

Henrik Lethilu Polar Seafoodimeersoq suli isumalluarpoq:

- Aalisaqataanerput peqqissimissutiginngilarput. Aalisarneq taamaappoq - ingerlalluartarlunilu ingerlanerliortoqartarpoq - taamaakkaluartoq pingaarutilinnik misilittagaqalerpugut, siulersuisut siulittaasuat taama oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk