Avaleraasartuut ukiormanna ikinnerunerinut nassuiaatissaq aana
Imavinni misissuinerit pillugit nunat tamalaat siunnersuisooqatigiiffiata ICES-ip avaleraasartuut pillugit aasaq manna misissuisitsinerat ullumi saqqummiunneqartoq taama inerneqarpoq.
Pinngortitaleriffiup oqaatigaa, atlantikup avannaata avaleraasartoortai aatsaat taama amerlatigisut nunatta kitaata imartaanut ingerlaarsimasut.
Aalisakkallu amerlanersaat Islandip imartaata kujataani naammattoorneqarput. Ikinnerungaartulli siammarfigisartakkamik nillernerisortaanut ilaatigut Kalaallit Nunaannut anngussimapput, tamaangalu 2014-imi amerlassuserisimasaasa sisamararterutaannit amerlanerulaaginnartut naammattoorneqarsimapput.
AAMMA ATUARUK Polar Seafood: Avaleraasartooqartillugu tamaaniiginnassaagut
AAMMA ATUARUK Avaleraasartoortarineqartut suli naammaannartut
Upernaap nillernerunera pissutaasoq
Nunatta imartaani 2015-imi taama avaleraasartuisatsigineranut peqqutaagunarpoq, avalaraasartuut suffisarfimminnit kingusinaarlutik ingerlaalersimanerat upernaallu nillersimaneranik peqquteqartumik ingerlaarnerata sivikinnerusimanera.
Avaleraasartuullu aamma Islandip kujataani neriniarfissaqqillluartumik nassaarsimapput, avaleraasartuullu aamma ikileriarsimassangatinneqarput, Pinngortitaleriffik allappoq nangillunilu:
- Tamakkulu peqqutaallutik kalaallit avaleraasartoorniutaat juulimi aggustimilu piisatsitsisimallutillu qaqutigiuinnaq nalaarsilluartarsimapput.
