Avaleraasartoortarineqartut suli naammaannartut
Aalisariutit 17-it misileraalluni avaleraasartoorniarnermi atorneqartut aggustip aqqaneq-aappaanni aalisarsimasaat ullormi ataatsimi aatsaat taama amerlatigipput, 2014-imi ukioq mannalu ullormi ataatsimi pisarineqartut qaangerneqarmata, tassami ullormi pineqartumi ataatsimi 2002 tonsit pisarineqarmata.
Nunatta imartaani avaleraasartuut ullormi ataatsimi pisarineqartut oqaluttuarisaanermi aatsaat taama amerlatigipput.
AAMMA ATUARUK Avaleraasartoorniat ukiormanna aatsaat taama pisaqartigisut
Pisarineqartulli kingorna ikiliartuinnavipput, tassami pisarineqartut marlunngorneq aggustip 18-iat ilanngullugu amerlagisassaanngillat, pisassiissutit 85.000 tonsiusut anguneqarnissaat allaat qularnarsinnaalluni.
Avaleraasartuunik ukioq manna sapaatip-akunnerini arfineq-pingasuni aalisarnermi pisarineqartut katillutik 28.326 tonsiupput. Siorna piffissap taamaalineranut sanilliukkaanni 20.000 tonsit sinnerlugit ikinnerupput, ukioq mannalu pisassiissutigineqartut 57.000 tonsinik inorneqarlutik.
Pisassiissutigineqartut Aningaasaqarnermut Naalakkersuisumit Andreas Uldumimit malinnaavigeqqissaarneqarput, tassami avaleraasartuunit isertitat aappaagumut aningaasanut inatsisissatut siunnersuummi ilaatigut isumalluutigineqarmata.
AAMMA ATUARUK Tunup avataani avaleraasartooqannginnerusoq
Avaleraasartuut 53.000 tonsit 2013-imi pisarineqarput, misileraallunilu avaleraasartoorniarneq siorna 2014-imi septembarip 25-anni naammassimmat katillugit 78.000 tonsit pisarineqarlutik.
Ukioq manna suli sapaatit-akunnerini tallimani arfinilinniluuunniit avaleraasartoorniartoqassaaq, maannamullu pisarineqartut 28.000 tonsit sinnilaaginnarmatigik pisassiissutigineqartut suli 57.000 tonsit missaannik sinneqarput.
