Avaleraasartoorniat ukiormanna aatsaat taama pisaqartigisut

Kilisaatit 17-iusut avaleraasartuunik 1405 tonsinik pisaqarsimallutik ippassaq tikipput, tamannalu sapaatit-akunnerata siulianut naleqqiullugu pitsaaneroqaaq, Niels Laursen Aalisarsinnaanermut akuersissutinik nakkutilliisoqarfimmeersoq KNR-imut taama oqarpoq.

Avaleraasartoorniarnerup aallartinneraniilli pingasunngorneq pisakinnerpaaffiuvoq, ullormimi tassani 155 tonsiinnarnik pisaqartoqarmat, kingornali pisarineqartartut amerliartuinnalerput.

AAMMA ATUARUK Tunup avataani avaleraasartooqannginnerusoq

Pisaqarujussuarnerli isumallualernissamut pissutissaqalersitsinngilaq, avaleraasartoorniarnermi siorna piffissap taamaalinerani pisanut naleqqiullugu 20.000 tonsinik kinguaattooqqaffiuvoq.

Taamaalilluni ataasinngorneq ilanngullugu 21.062 tonsit pisarineqarsimalerput, siorna piffissap taamaalinerani 41.187 tonsit pisarineqartut. Tassalu affaasa missaat. Taamaammat ukiormanna pisassiissutigineqartut 85.000 tonsiusut tamakkerneqarsinnaassanersut nalunarpoq.

- Pisassiissutit tamakkerneqarsinnaassanersut oqaatigissallugu suli siusippallaarpoq, taamaattoqassappammi ippassartut pisaqartoqartarnissaa pisariaqassaaq, Niels Laursen taama oqarpoq.

Avaleraasartuunik ikinnerusunik pisaqartoqarneranut pissutaasoq tassaavoq avaleraasartuut Tuluit Nunaata qeqertaasa kitaanni suffisarfimminnit ukiormanna ingerlaarnerat upernaap nillernerunera pissutigalugu kingusinnerullunilu sivikinnerummat.

AAMMA ATUARUK Avaleraasartoorniarneq suli pisaqarfiuvallaanngilaq