Avaleraasartoorniarneq siuariarfiusoq
Tunumi avaleraasartoorniarneq ingerlalluartupilussuuvoq, siornamullu naleqqiullugu amerlanernik aalisartoqarsimalereerpoq. Naalakkersuisut nittartakkaminni taama allaaserisaqarput.
Allattoq Jonas Fievé
aggustip 23-at 2018 16:07
Avaleraasartunut pisassiissutinit 66.365 tonsiusunit 50.558 tonsit maannamut aalisarneqareerput, tamannalu 2017-imi aalisarneqartunut 46.727 tonsiusunut naleqqiullugit amerlanerulereerput.
- Tunumi avaleraasartuunik pisaqarluartoqarnera naammagisimaarparput, tamatumalu naalagaaffiit sineriallit ukiamut isumaqatigiinninniarnissaannut Kalaallit Nunaata inissisimanera patajaallisissavaa. Avaleraasartoorniarnerup Kalaallit Nunaata imartaani suli nangeqqinnissaa kissaatigaarput, aalisarnermut, piniarnermut nunalerinermullu naalakkersuisoq, Erik Jensen tusagassiuutinut nalunaarummi oqaaseqarpoq.
Akerlianilli Tunumi ammassassuarnik ukioq manna suli aalisartoqalinngitsoq, Naalakkersuisut allaput.
