Nunarput Parisimi isumaqatigiissummut ilanngutissanersoq, Siumup ersarissumik akerusunngilaa
Nunatta Parisip isumaqatigiissutaanut ilanngunnissaa pillugu Siumut qanoq isumaqarnerluni suli oqaatigerusunngilaa.
- Taannalu siumoorluta inisseriinngikkaluarlugu kisianni qilanaarluta pissangallutalu utaqqissavarput oqallinneq sumut qanoq inissikkumaarnersoq. Siumumiit uagut tunngavitsinnik aallaqqaataaniilli oqariartuutigisimasagut taakkuupput, tassalu inuiaqatigiinnut kingunissai suunersut qulakkeerluarsimanissaat, Siumut siulittaasuat Erik Jensen oqarpoq.
Nunalerinermut, immminut pilersornermut, nukissiuutinut avatangiisinulu naalakkersuisup, Kalistat Lundip (IA) nunarput Parisimi isumaqatigiissummut ilanngunnissamut siunnersuut naalakkersuisut sinnerlugit Inatsisartunut ingerlateqqippaa.
Nunarput nunarsuup kiatsikkiartorneranik killilersimaarinneqataalerneranik kinguneqartumik nunat tamalaat Parisimi isumaqatigiissutaannut ilanngutissasoq, Naalakkersuisut kissaatigigaat taassani allassimavoq.
Nunarput Parisip isumaqatigiissutaannut ilanngutissappat nunatsinnut aningaasaqarnikkut qanoq sunniuteqassanersoq pillugu paasissutissanik siorna inatsisartut upernaakkut ataatsimiinneranni Siumumiit amigaateqarsorineqarmat, nalunaarusiortoqarpoq.
Maanna kingunerisinnaasai nalilersorneqareerlutik aalajangiiffigisassanngorlugu siunnersuutissatut piareerneqarpoq, Siumulli suli nalorninermiippoq.
Kingunerisinnaasai erseqqinngitsut
Nunarput Danmarkip CO2-mik aniatitsinikinnerulernissaatulli pisussaaffeqanngikkaluarluni Parisimi isumaqatigiissummut ilanngussinnaasoq, nalunaarusiami nutaami erserpoq.
Nunarput Danmarkip CO2-mik aniatitsinikinnerulernissaatulli pisussaaffeqanngikkaluarluni Parisimi isumaqatigiissummut ilanngussinnaasoq, nalunaarusiami nutaami erserpoq. Assersuutigalugu aaalajaangerneqarsinnaavoq. nunarput aatsitassarsiornermut aalisarnermullu tunngasuni CO2-mik aniatitsinikinnerulertariaqanngitsoq.
- Ukiut siulliit qulit 15-it aatsitassarsiorneq annikillisaaniarnermi ilaatinngikkallarsinnaavarput, aamma imaassinnaavoq oqartugut aalisarneq aalisariutillu ilaatinngikkallassallugjt, Siunissamili ukiut qulit 15-it qaangiuppata orsussat mingutitsinngitsut nalinginaanerulersimassasut naatsorsuutigaarput, Kalistat Lund oqarpoq.
Taamaakkaluartorli kingunissat ersarinngitsut Siumut isumaqarpoq.
Siumumiit suunuku qulakkeerlugit paaserusukkisi?
- Uanga illillu aningaasaqarnitsinnut qanoq sunniuteqarsinnaanera qulakkeerinnilluarsimanissaq taassuma saniatigut apeqqutit qulaarluarsimanissaat pingaartikkatsigu taamaattumik oqariartuutigisimasagut uagut tunngavitsigut suli taakkuusut ataatsimiititaliamut suliassanngornissaanut oqariartorsimanitsinnut tunngaveqarpoq.
Naalakkersuisut sinnerlugit
Nunarput Parisimi isumaqatigiissummut ilanngutissanersoq pingasunngornermi Inatsisartuni siullermeerneqarussaagaluarpoq, ullorli qiterpaarluinnartoq qulequtaq maajup qulingiluaannut kinguartinneqarpoq.
Aalajangingassatulli siunnersuut Inatsisartunut saqummiunneqarpat, Sulili nalorniffiussaaq. Tassami Naalakkersuisoqatigiit, Siumup peqataaffigisai, sinnerlugit saqummiunneqassaaq.
Sooruna aaalajangiiffigisassatut siunnersuummik, qanoq isumaaqarfigissanerlugu nalornisssutigisassinnik, saqqummiusseqataavisi?
- Oqareernertuut, isumaqarpunga inernileereernissaq oqaatigissallugu siusippallaartoq. Inatsisartut taanna sammissavaat, Inatsisartut aalajangissavaat, aamma taasisoqalinngilaq oqallinneq aallarniutaaginnarpoq.
Nunarput Parisimi isumaaqatiissuummut ilanngutissasoq Siumut isumaqarpa?
- Tamatuminnga Inatsisartut naliliiumaarput. Kisianni qulequttanik arlalinnik qulakkiigassaqartugut isumaqarpunga. Taakkulu aalajangiiffigisassatut siunnersuutigineqannginneranni itinerusmik misissorneqarnissaannik Siumumiit kissaateqassaagut
Siunnersuut amerlanerussuteqartunit akuersissutigineqarpat nunarput Parisimi isumaqatigiissummut ukiaru aatsaat ilanngussinnaalissasoq, Kalistat Lund oqarpoq.