Umiarsuaatileqatigiiffiup Maerskip umiarsuaasa ilaanni ikuallattoqarmat inuk ataaseq ajunaartoq

Maerskip umiarsuaasa ilaanni Maersk Frankfurtimi, maanna Det Arabiske Havimiittumi, ikuallattoqarmat inuttat ilaat ajunaarpoq.

Maerskip tusagassiisarfia TV2-mut taama ilisimatitsivoq.

Inuttat sinnerani isumannanngitsut aamma nalunaarutigineqarpoq.

Indiamiut sinerissamik nakkutilliisuisa oqarnerat naapertorlugu umiarsuarmi ikuallattumi suli qamisaasoqarpoq. Ulloq unnuarlu maannamut ikuallattoqarpoq.

Maerskip umiarsuaasa ilaanni ikuallannermik qamisaaqataasussanik umiarsuarnik qatserisartunillu allanik ullumi peqataasoqarpoq. Indiami sinerissamik nakkutilliisut inoqatinut attaveqqaqatigiittarfikkut X-ikkut arfininngornermi taama allaaserisaqarput.

Timmisartoq, qulimiguulik umiarsuillu allat pingasut qamisaanermut peqataapput.

Umiarsuaq Det Arabiske Havimi ikuallalersoq

Indiami nunap immikkoortuata Goap sineriaata avataani Det Arabiske Havimi ikuallattoqalerpoq, 100 sømilit, imaluunniit 185 kilometeritut avasitsigisumi ikuallattoqalerluni.

Ulloq unnuarlu qamisaaniartoqarpoq.

Qamisaanermit assit videoliallu X-ikkut takuneqarsinnaapput.

Umiarsuaq minnerulaartoq qamisaasoq assini ilaatigut takuneqarsinnaavoq.

Timmisartoq aamma atorneqarpoq, umiarsuup ikuallattup nalaani nalilersuinermut ilaatigut atorneqarluni.

Umiarsuaq Indiami illoqarfimmit Mundramit Sri Lankami illoqarfimmut Colomboliartilluni silapilunnerata nalaani ikuallalerpoq. Maritime Danmark taama ilisimatitsivoq.

/ritzau/