Kommune Kujalleq arnanut qitornalinnut qimarnguimmik nutaamik ammaasoq

Nanortalimmi arnanut qitornalinnut maanna qimarngueqalerpoq. Taamaalillutik Kommune Kujallermi arnat qitornallit maanna illoqarfinni tamani qimarngueqalerput.

Allattoq Paarnannguaq Nielsen

novembarip 25-at 2024 10:34

Arnat qitornallit sakkortuuliorfigineqartartut Kommune Kujallermi illoqarfinni tamani maanna saaffissaqalerput.

Nanortalimmimi qimarnguik oktobarip aallartinnerani ammarneqarpoq, taamaalilluni Kommune Kujallermi illoqarfiit tamarmik arnanut qitornalinnut qimarngueqalertut.

Kommune Kujalleq nittartakkamini taama allappoq.

Ikiorsiisoqartartoq

Arnat qitornallit angerlarsimaffimminnit qimarnguiliaraangamik sunnguamilluunniit nassataqarneq ajortut, Ilaqutariinnik sullissivimmi katsorsaanermut aqutsisoq Najanguak Knudsen oqarpoq.

- Taamaammat ineeqqamik atorunnagaannik tamanik pequsersukkamik aallarniuteqartarput, tassanngalu kommunimi ikiuisartumit katsorsarneqarlutik aallartittarlutik, Ilaqutariinnik sullissivimmi katsorsaanermut aqutsisoq nittartakkami taama oqarpoq.

Kikkut qimarnguimmiissinnaatitaappat?

Kinaluunniit Arnaq qitornanilu timikkut tarnikkullu persuttagaasimasoq meeqqani ilagalugit qimarnguimmut qimarngusinnaatitaavoq.

Kommune kujallermi innuttaassusillit kisimik arnat qitornallit qimarnguianut inississinnaatitaapput meerartaqarunik.

Arnat pisatsersukkamik ikiorserneqarnerata saniatigut qitornaasut aamma Mary Fondenimit tapiiffigineqartarput.

Meeqqat qimarnguimmiittut ulluinnarni ingerlaqqinnissaannik tapersersorniarlugit taamaaliortoqartartoq, nittartakkami allaqqavoq.

Siunnersortit ikiuuttartut

Arnat qaammatit pingasut tikillugit qimarnguimmiissinnaatitaasut, tamatumalu kingorna isumaginninnermi siunnersortinit pisut ataasiakkaat suliallu pillugit nalilersuisoqartartoq, nittartakkami allaqqavoq.

Ikiorneqarnissamik pisariaqartitsiguit kommunemi qimarnguinni saaffissat uani takusinnaavatit.

Nutaarsiassami kukkunermik nassaarsimaguit uunga allaffigineqarsinnaavugut.