Naalakkersuisoq angajoqqaanut misissuutit pillugit: Neriorsuuteqarnikuunngilanga

Aqqaluaq B. Egedep danskit kommuniisa inissiisarnermi suliani misissuutit atorunnaarsinneqarnissaat pillugit oqaaseqarnermini sapaatip akunnera qaangiuttoq neriorsuinnginnerarpoq. Taassuma danskit ministeriat neriorsuuteqartuusoq oqaatigaa.

Allattoq Kim Hinrichsen, Jaaku Lyberth

novembarip 25-at 2024 14:27

Allaatigisaq danskit isumaginninnermut ministeriata marlunngornermi ullaakkut akissuteqarnerata kingorna nutartigaavoq.

- Naqqissavakkit uanga neriorsuinngilanga. Danskit socialministeriat neriorsuivoq, kukkulluni suleriaaseqarnertut naliligaasoq atorunnaarsinniarlugu.

Meeqqanut inuusuttunullu naalakkersuisoq, Aqqaluaq B. Egede (IA), KNR-imut tallimanngormat ualikkut oqarpoq.

Tamatuma kingunitsianngu danskit kommuniisa kalaallit angajoqqaat piginnaasaannik misissuinermut atatillugu tarnip pissusianik misissuutit oqallisaasut atorneqarnerat unitsissagaat tusagassiuutinut nalunaarummi oqaatigaa.

Aamma atuarukDanmarkimi naalakkersuisut nalileeriaatsimik atuineq ammillu qalipaataa patsisigalugu immikkoortitsineq unitsikkaat

Tusagassiuutinut nalunaarut danskit isumaginninnermut ministeriata, Sophie Hæstorp Andersenip (Socialdemokraatit) ullut sisamat qaangiutiinnartut naqqiissuteqarfigaa.

- Isumaginninnermut ineqarnermullu ministeritut kommunit ilaqutariinnik kalaallisut tunuliaqutaqartunik suliaqarnerminni misissuutit isornartorsiorneqangaatsiartut atorneqartarnerisa unitsinneqarnissaat kaammattuutigerusuppara, Sophie Hæstorp Andersen KNR-imut novembarip 19-iani marlunngornermi allappoq.

Kaammattuutaannaanngitsoq

Taamaammat Danmarkimi kalaallit angajoqqaat toqqissisimanernissaannik kinguneqanngitsoq isumaqatigiinniarnerit ajornakusoornerat pineqarpoq.

Misissuutilli isornartorsiorneqangaatsiartut atorunnaarsinneqartussatut neriorsuutaagaluartut atorunnaarsinneqarnissaannut isumaliuteqarnissamut kaammattuuteqaannarneq atorunnaarsitsinissamut ungasippoq.

Thisted Kommunimi kalaallit Kerira Kronvoldip meeraanik arsaarinniffiusumi Meeqqanut Ilaqutariinnullu ingerlatsivimmi pisortaq pingasunngornermi ullaakkut P1 Orienteringimiippoq, taassumalu kommunip tarnip pissusianik misissuutit atorunnaarsinnianngikkai oqaatigaa.

Angajoqqaat piginnaasaanik misissuutit suuppat?

Misissuutit tamarmik malittarisassat malillugit suliarineqartarput. Angajoqqaat piginnaasaannik misissuinerup imarisaa allanngorarsinnaavoq, misissoriaaserli imaakkajuppoq:

Angajoqqaat aamma sulianik isumaginnittup kiisalu tarnip pissusianik ilisimasallip angajoqqaat piginnaasaannik misissuisussap akornanni aallartisarnermi ataatsimiinneq. Suliassap imarisaa isumaqatigiissuteqartarpoq, misissuinerup ingerlanissaata imaa oqaluuserineqartarpoq, angajoqqaaq taamaalilluni ingerlatsinissamut sapinngisamik piareersimasarluni. Piffissat, sumiiffissat sivisussusissaalu aalajangerneqartarput.

Suliami allagaatit naleqquttut misissorneqartarput. Tamanna tarnip pissusianik ilisimasalimmit suliarineqartarpoq.

Angajoqqaat tunuliaqutaat inuunerallu ilaatigut pillugit misissuilluni apersuinerit.

Angajoqqaat misissorneqarnerat. Misissuinerup ilusaa suliassap suunera apeqqutaasarpoq. Tamanna nalinginnaasumik inuttut qanoq ittuuneranik msissuinermut aamma eqqarsartaatsikkut qanoq inneranik kiisalu attaveqariaatsimik attaveqarnermullu piginnaasanik misissuinermut tunngagajuppoq.

Suliassap qanoq innera apeqqutaalluni meeraq tarnip pissusianik ilisimasalimmik aamma misissorneqartarpoq. Tamanna misissuinissaq sioqqullugu isumaqatigiissutigineqartarpoq.

Sunniivigeqatigiinnernik nakkutilliineq. Ilaqutariit sunniivigineqatigiinnerannik aamma suliamut pineqartumut atatillugu nakkutilliinerit aaqqissuunneqarnerat.

Utertitsiviginninnermi ataatsimiinneq siullermik angajoqqaat peqatigalugit kingornalu angajoqqaat suliamillu isumaginnittoq peqatigalugit nalunaarusiaq misissuinerullu inerneri misissorneqartarput.

Paasissutissarsiffik: www.forældrekompetenceundersøgelse.dk

Allisiguk

Taamaammat Aqqaluaq B. Egede sukkavallaalaarluni kalaallinut angajoqqaanut Danmarkimiittunut eqqunngitsumik neriuutissaqalersitsisimasoq tunngavilersorneqarsinnaavoq.

Naalakkersuisorli taama isumaqanngilaq. Taassuma danskit ministeriata ataatsimiinnermi oqaatigisai ingerlateqqiinnarpai:

- Danskit ministeriat uagutsinnut neriorsuisimaguni, eqqortumik timitaliisussavoq. Taanna uanga tusagassiorfinnut nalunaarutigisinnaarusuppara, taanna oqarpoq.

Aamma atuarukPeqatigiiffiit Aqqaluaq B. Egedep nalileeriaasiusut pillugit nalunaarutaanut: Tusarluarnarpoq, naammaginarnanili

Taamaammat isumaginninnermut ministerip maanna kommunit misissuutinik oqallisaangaatsiartunik atorunnaarsitsinissaq isumaliutersuutigissagaat kaammattuutiginiarlugu oqarnera meeqqanut inuusuttunullu naalakkersuisup aamma uissuummissutigaa.

- Isumaqatiginngilarput kaammattuuteqarsimanera, neriorsuigami atorunnaarsinniarlugu, aamma inuit pisinnaatitaaffiinik unioqqutitsinertut isigivarput, meeqqat pisinnaatitaaffiinik unioqqutitsinertut isigivarput, Aqqaluaq B. Egede oqarpoq.

Inatsisit atornagit neriorsuineq

KNR-ip siusinnerusukkut nassuiaateqarneratulli isumaginninnermut ministerip Danmarkimi kommunit misissuutinik qularutigineqartunik atueqqujunnaarlugit pinngitsaalisinnaanngilai. Danmarkimimi kommunini kommunalbestyrelsit sulianik isumaginninnernik aalajangiisarput.

- Kommunalbestyrelsip inatsisit tunngavigalugit meeqqat pillugit sulianut naleqqussaanissaq piginnaatitaaffigaa, isumaginninnermut ministeri KNR-imut septembarip 19-ianni allappoq.

Aamma atuarukDanskit isumaginninnermut ministeriat angajoqqaanut misissuut oqallisaangaatsiartoq pillugu kommuninut allakkamik nassiussisoq

Aqqaluaq B. Egedep danskit kommuniinit atorunnaarsinneqarnissaannik neriorsuuteqarnera aamma eqqumiiginarsinnaavoq.

Taamaakkaluartorli Aqqaluaq B. Egedep danskit kommuniisa suliaqartarnerannik allannguiniarluni Sophie Hæstorp Andersenip ataatsimiinnermi imminut neriorsuinera aalajangiusimaannarpaa:

- Neriorsueriarluni nunatta naalakkersuisunut imatut iliorniarpunga allatorluinnarlu iliuuseqarluni, taamaattumik suliaq una danskit ministeriinut misaallatsinneqartariaqarpoq.

KNR-ip Danmarkimi Isumaginninnermi Ineqarnermullu ministeri Aqqaluaq B. Egedep oqaatigisaanut atatillugu akissuteqarluni oqaaseqaqquaa. Ministerip angajoqqaanut misissuutit atorunnaarsinneqarnissaannik naalakkersuisorlu ataatsimiinnerminni neriorsuisimaneragaanini allakkatigut akissummini oqaaseqarfiginngilaa.

Misissuutilli atorneqartarnerisa unitsinnissaat Danmarkimi kommuninut kaammattuutigisimagini oqaatigeqqippaa.

- Suleqatigalu naalakkersuisoq Aqqaluaq B. Egede tallimannganngornerup siuliani ataatsimiippugut. Misissuutit kalaallit ilaqutariit ataatsimut isigalugit soorlu oqaatsitigut kulturikkut tunuliaqutaannik eqqarsaatiginniffiunngitsuusut atorunnaarsinneqarnissaannut sutigut tamatigut isumaqatigiippugut. Taamaammat misissuutit taakkua atorunnaarsinneqartariaqartut isumaqarpunga.

- Taamaammat Danmarkimi kommunit tamarmik misissuutinik taakkuninnga suliani kalaallinut attuumassutilinni atuiunnaarnissamik isumaliuteqarnissaat kaammattuutigalugu allagaqarfigaakka. Kommuninimi kommunalbestyrelsit meeqqamik allamut iniisseeratarnissamik suleriusissanik inatsisit tunngavigalugit aalajangersaasussaatitaapput, danskit isumaginninnermut ineqarnermullu ministeriat KNR-imut allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.