Naalakkersuisut Parisimi isumaqatigiissut pillugu siunnersuut ukiamut kinguartippaat
Upernaaq manna Naalakkersuisut siulittaasuat Múte B. Egede (IA) Kalaallit Nunaata Parisimi isumaqatigiissut pillugu nalornineranik atorunnaarsitsinissamik Inatsisartunut siunnersuuteqartussaagaluarpoq.
Inuit Ataqatigiit Múte B. Egede siuttoralugu kissaatigaat Kalaallit Nunaat Naalagaaffiit Peqatigiit Parisimi isumaqatigiissutaannut ilanngutissasoq.
Kisianni siunnersuut Múte B. Egedemit namminermit tunuartinneqarpoq.
Naalakkersuisut siulittaasuat nassuiaavoq Siumumik naalakkersuisooqateqalerneq peqqutigalugu siunnersuutip ukiamut kinguartinneqarnissaa toqqarsimallugu.
- Naalakkersuisoqatigiinnissamik isumaqatigiissut tunngavigalugu Paris-imi isumaqatigiissut siusinnerpaamik ukiaru Inatsisartut ataatsimiinnissaanut qaqeqqinneqarnissaa tassanngaaniillu qaqitseqqinnissaanut tungaanut qulaajagassat assigiinngitsut inuiaqatigiinnut kingunissaanut tunngasinnaasut aaqqinneqarnissaat siunertaralugu taamatut tunuartitsineq tunngaveqarpoq Múte B. Egede oqarpoq.
Aningaasaqarnermut inatsit pillugu siorna isumaqatigiinnermut Siumut peqataajumasimanngilaq, Paris-imi isumaqatigiissutip isumaqatigiissummi ilaanissaa partiip akerlerigamiuk.
Partiip amigaatigisimavaa Paris-imi isumaqatigiissut nunatta tunisassiorneranut aningaasaqarneranullu qanoq kinguneqassanersoq paasissutissanik amigaateqarami. Taamaattumik partiip piumasarisimavaa siunnersuutip ukiamut kinguartinneqarnissaa, Naalakkersuisut isumaqatigiissutip inuiaqatigiinnut qanoq sunniuteqarnissaa misissorsinnaaniassammassuk.
Kalaallit Nunaata klimamut anguniagaqarnissaa pisariaqanngilaq
Siunnersuutip imaraa Inatsisartut Naalakkersuisut pisinnaatissagaat danskit naalakkersuisuinut nalunaaruteqarnissaannik Kalaallit Nunaata Paris-imi isumaqatigiissummut naaggaarnerat angerninngortinneqassasoq.
Siorna novembarimi Naalagaaffiit Peqatigiit Skotlandimi klima pillugu siuttunik ataatsimiisitsineranni Múte B. Egede nunarsuarmiunut tamanut erseqqissarpaa Kalaallit Nunaat Paris-imi isumqatigiissummut ilanngutissasoq.
Isumaqatigiissutip imaraa nunat tamarmik imminnut pisussaaffilissasut CO2-mi aniatitsinermik annikilliliinissaminnut.
2015-imiilli Kalaallit Nunaat isumaqatigiissummut nalornissuteqarsimavoq. Taamani nunat allat pillugit naalakkersuisoq Vittus Qujaukitsoq Kalaallit Nunaata isumaqatigiissummut ilanngunnissaa naaggaartuuvoq.
Vittus Qujaukitsoq naapertorlugu isumaqatigiissut Kalaallit Nunaannut naapertuilluanngilaq, nunap tunisassiorfeqarnikkut ineriartorneranut akornutaasinnaammat, assersuutigalugu aatsitassarsiornermi suliniutinut.
Kisianni siorna Naalakkersuisut nalunaarutigaat Pari-imi isumaqatigiissummut ilanngunniarluni Kalaallit Nunaata CO2-mik aniatitsinermik annikilliliinissaata aalajangersimasumik annertussuseqarnissaa pisariaqanngitsoq.
Múte B. Egede aamma Inuit Ataqatigiit aamma isumaqarput Paris-imi isumqatigiissummut ilanngunnerup ”Kalaallit Nunaannik annertunerusumik soqutiginninneq aamma klimamut tunngasunik aningaasaateqarfiit atortussallu nunanit assigiinngitsuneersut, klimamut iluaqutaasussamik allannguinermik tapersersuisut, iserfigisinnaanissaat nassatarisinnaagaa.”
Kisianni Kalaallit Nunaat pisortatigoortumik Paris-imi isumaqatigiissummut ilanngutsinnagu Inatsisartuni suliarineqassaq akuerneqarlunilu, tamannaliu siusinnerpaamik Inatsisartut ukiamut ataatsimiinneranni pisinnaavoq.