Nunarput Issittumi silap pissusia pillugu suliniuterujussuarmi peqataasoq
Issittumi silap pissusiata allanngoriartornera qanoq pilertortigaa, tamannalu silarsuup sinneranut qanoq sunniiva?
Tamanna suliuterujussuartaami ilisimatusarfigineqarluni paasiniarneqassaaq. Suliniuterujussuaq taanna Greenland Integrated Observatory Systemimik ateqartoq naalagaaffeqatigiinni susassaqartut silap pissusiata allanngoriartornera pillugu ilisimatusarfiussaaq.
Susassaqartut nunatsinneersorpaaluit soorlu Pinngortitaleriffik Ilisimatusarfillu 2025-p naanerata tungaanut suliniutaasussami peqataassapput.
Uuttortaaviit imminik uuttuisartullit
Issittumi silaannaap, sikup, nunap immallu allannguutaanik uuttuisartunik nutaaqqinnaamik attaveqaatiliortoqassasoq, Pinngortitaleriffik tusagassiuutinut nalunaarpoq.
- Uuttortaavittaat imminik uuttuisartullit iluaqutsiullugit siornatigut tikikkuminaatsitavut ilisimatusarfigisinnaanngussavagut.
- Nunarsuatsinnilu qeqertat annersaata nunartaani imartaanilu uuttortaaveqarfiit nunarsuarmi silap allanngoriartorfeqarfiunerpaasuni qanoq pisoqartarneranik naleqaqisunik ilisimasaqartilissavaatigut, Pinngortitaleriffik tusagassiuutinut nalunaarummini allappoq.
AAMMA ATUARUK Nunatta Danmarkillu ilisimatuussutsikkut suleqatigiinneq aallartilluaraat
Danskit ilinniartitaanermut ilisimatusarnermullu ministereqarfiat suliniummut aningaasaliisuuvoq.
Pinngortitaleriffik taavalu Danmarkimi ilisimartusarfiit ilarpaalui suliniummi Aarhus Universitetimit siuttuuffigineqartumi peqataassapput. Ilaatigullu ASIAQ Greenland Survey, DMI, Issittumi Sakkutooqarfik, Nunatta Katersugaasivia Allagaateqarfialu, Ilisimatusarfik Savalimmiunilu Havstoven aamma peqataassapput.
