Nunatta Danmarkillu ilisimatuussutsikkut suleqatigiinneq aallartilluaraat
Tamanna Issittumi ilisimasassarsiortunut nunatsinneersunut, Danmarkimeersunut nunanillu allaneersunut katersuuffiussaaq nunatsinnilu inuiaqatigiinnut iluaqutaassalluni. Tamakku nunatta Danmarkillu immikkut suleqatigiinneranni aallartinissartumi pingaarnertut anguniagaapput. Suleqatigiinneq, Nuummi allattoqarfeqalernikkut aallartinissarneqaleruttortoq, International Arktisk Hubimik ateqarpoq.
Tassanimi siulersuisunngorlaat Anna-Sofie Skjervedal International Arktisk Hubip allattoqarfigiligassaani pisortanngortussatut ukioq manna novembarip aallartinnerani toqqarpaat. Allattoqarfimmi atorfinittussanik allanik marlunnik inuttassarsiuussisoqassaaq. Siulersuisut siulittaasuat DMI-llu pisortaanut tullersorti, Ulrik Korsholm, taama nassuiaavoq.
Allattoqarfissap International Arktisk Hubip pilersinniarnera
Danmarki nunarpullu Issittumi ilisimatusarnermi tunngasuni allattoqarfimmik nunatsinni pilersitsinissamik 2018-ip naanerani suleqatigiilerput.
Suliniut danskit naalakkersuisuisa nunanut allanut sillimaniarnermullu 2019-202-mi periusissiaata ilagaa
Danskit naalakkersuisui 2019-imi aningaasanut inatsit naapertorlugu ukiumut 3 millionit koruuninik allattoqarfissamut 2019-imiit 2022 ilanngullugu aningaasaliisarput.
Naalakkersuisut ukiumut 750.000 koruuninik aningaasaliisarput.
Suliniut 2020-mi maajip qaammataani siulersuisoqalerpoq. DMI-p pisortaanut tullersorti, Ulrik Korsholm, siulersuisut siulittaasoraat.
Siulersuisut Anna-Sofie Skjervedal International Arktisk Hubip allattoqarfigiligassaani pisortanngortussatut ukioq manna novembarimi toqqarpaat.
Allattoqarfimmi atorfinittussanik allanik marlunnik inuttassarsiuussisoqassaaq.
Tusarfik: Ilinniartitaanermut ilisimatusarnermullu ministereqarfik DMI-lu
Allattoqarfissaq Issittumi ilisimatusarnermut tunngasunik aallaaviuinnarani, Issittumi ilisimatusarnermik Kalaallit Nunaatalu inuinik attaveqatigiilersitsiviussasoq, Ulrik Korsholm oqarpoq.
- Tassa imaappoq, Kalaallit Nunaanni Issittumilu ilisimatusarnermik malinnaaviussaaq, ilisimatusarnermullu tunngasut ilinniarfinnut suliffeqarfinnulluunniit, paasissutissanik ilisimasanilluunniit atorfissaqartitsisunut, aallaaviussussanik pilersitsiniassalluta, Ulrik Korsholm oqarpoq.
Sillimaniarnermut periusissiap ilagigaa
Suliniut Danmarkimi nunatsinnilu aningaasanut inatsisinit aningaasalersugaavoq. Taannalu danskit naalakkersuisuisa nunanut allanut sillimaniarnermullu 2019-2020-mi periusissiaata ilagaa. Danskillu naalakkersuisui ukiumut 3 millionit koruuninik Namminersorlutik Oqartussallu ukiumut 750.000 koruuninik tamatumunnga 2019-imiit 2022 ilanngullugu aningaasaliisarput.
Allattoqarfillu aallartilluaruni soorlu Kalaallit Nunaanni ilinniarfinnut iluaqutaassaaq:
- Ilinniartitsisut, atuartitsissutissanik allagaatinilluunniit atuartitsinermi najoqqutassanik atorfissaqartitsippata, taava allattoqarfik inunnut ilisimasalinnut atorfissaqartitanillu tunniussisinnaasunut innersuussisarfiusinnaavoq. Taamaalilluta ilisimatusarnermi paasisat soorlu atuartitsinermi najoqqutariuminarsarsinnaavagut, siulersuisut siulittaasuat Ulrik Korsholm oqarpoq.
Issittumi ilisimatusarnermi tunngasuni allattoqarfik Pikialaarfimmi Nuummi Pinngortitaleriffiup eqqaaniippoq, pisortaalu tassani allaffeqarluni.
