Nunarput Arctic Winter Gamesimi ujaminnannissaanut neriuutissaqarluartoq

Arctic Winter Games corona pissutigalugu ukiut tallimangajaat aaqqissuunneqanngereerluni aaqqissuunneqaqqittussanngorpoq. Unammisaqattaarnerit ukioq manna Canadami Wood Buffalomi nunap immikkoortuani Albertamiittumi aaqqissuunneqassapput, nunatsinnilu timersoqatigiit kattuffiannit Arctic Winter Gamesimut chef de missioniusoq, Aviaaja Geisler aallarnissamut qilanaarpoq.

- Timersornermik aaqqissuussinerinnaanani aamma kulturikkut aaqqissuussineruvoq annertooq. Taakku marluk ataatsimoortinnerat pissutigalugu aaqqissuussineq immikkoorluinnartuuvoq. Timersortartut, sungiusaasut aqutsisullu amerlasuut ukiuni arlalinni ilaanikuupput, taamaammat takoqqittussarpassuupput, taanna oqarpoq.

Nunatta timersortartut 67-it timersuutini assigiinngitsuni arfinilinni peqataasussat ukioq manna aallartissavai. Taakku Arctic Sportsimi, Dene Gamesimi, volleyballimi, sulorarnermi, nerrivimmi arsaararnermi snowboardimilu peqataassapput.

AAMMA ATUARUK Arctic Winter Games 2022 kinguartinneqartoq

Naak timersortartut 67-it amerlarpalussinnaagaluartut taakku nalinginnaasumik aallartinneqartartunit 150-it missaanniittunit ikinnerungaatsiarput.

Tamatumunngali pissutissaqarluartoq, Aviaaja Geisler nassuiaavoq.

- Nunatsinni Timersoqatigiit Kattuffiata tungaaniit ukioq manna aaqqissuussinerit angisuut marluupput. Tassa Arctic Winter Games aamma Island Games aasamut aaqqissuunneqartussaq. Taamaammat kattuffiit timersortartunik aallartitsinissaat akisuvoq, taanna oqarpoq, nangillunilu:

- Kattuffiit ilaat aningaasaatiminnik ukioq manna qanoq atuinissaminnik eqqarsarluartariaqarsimapput. Timersortartunik maanna piareersimasoqarnersoq, imaluunniit aappaagu Arctic Winter Gameseqarnissaanut utaqqillutik pingaarnersiuissanerlutik. Kattuffiillu ilaat taamaaliorput, tamannalu paasilluarsinnaavarput.

Arctic Winter Gamesip ukiuni kingullerni taamaatiinnarneqartarnera pissutigalugu tullissaa 2024-mi aaqqissuunneqaqqittussaavoq.

Naatsorsuuteqangaatsiartut

Aviaaja Geislerip oqarnera naapertorlugu timersortartut peqataasussat ikinnerat aamma timersuutit ilaannit nunatta nalinginnaasumik peqataaffigisartaanit ukioq manna peqataasoqassannginnera aamma peqquteqarpoq.

- Assersuutigalugu futsalimi peqataasoqartaraluarpoq, taakkulu amerlanerupput. Aamma sangusaartartunit, ujakkaartartunit, sisoraatinik biathlonertartunit kiisalu volleyballimi nukappiaqqat peqataassanngillat. Amerlasuullu aamma ukioq manna peqataassanngitsut, taanna oqarpoq.

Naak timersortartunik nunatsinnit Arctic Winter Gamesimut ukioq manna peqataasukinnerugaluartoq Aviaaja Geislerip nunatsinnilu timersoqatigiit kattuffiata nunatta tungaaniit peqataasussat piginnaasaqarluarnissaat suli naatsorsuutigaa.

- Timersortartortagut naatsorsuuteqarfigilluarpagut. Sungiusarnissamut piffissaqarluarnikuupput. Aamma aallarnissamut unamminissamullu pilerilluartoqarnissaa takorloorsinnaalluarpara, Aviaaja Geisler oqarpoq.

AAMMA ATUARUK Ukiut arlallit taamaatitsisoqartareersoq: Arctic Winter Games ukioq ataaseq qaangiuppat pissaaq

Unammisassallu aamma pikkorilluinnartuussapput. Tamannali nunatsinni timersortartut nunatsinnut ujaminik angerlarsiinnginnissaannik isumaqannginngilaq. Muminganilli.

- Nunatsinni Arctic Winter Gamesimut aallartitat ujaminnannissaat neriulluarnarpoq. Dene Gamesimi, snowboardimi, sulorarnermi, nerrivimmi arsaararnermi inuillu pinnguaataani assigiinngitsuni, Aviaaja Geisler naggasiivoq.

Ukioq manna Arctic Winter Gameseqarnerani timersuutini assigiinngitsuni 20-ni unammisoqassaaq. Nunatta peqataanerata saniatigut Alaskamit, Alberta Northimit, Northwest Territoriesimit, Nunavic-Quebecimit, Nunavummit, Sapmimit aamma Yukonimit peqataasoqassaaq.