Nunaqarfinniit illoqarfinnut nuukkusuttut kisitsisaatigineqalerusupput

Apeqquteqaatit assigiinngitsut inatsisartut ataatsimiinneranni ullumi sammineqarput. Timmiarussat eqqissisimatinneqalernissaat, angajoqqaat avinnerini meeqqat ajornartorsiuteqalersarnerat taavalu nunaqarfinni innuttaasut illoqarfinnut nuussinnaalernissaat oqaluuserineqarput.

Apeqquteqaatit oqaluuserineqaraangata aalajangiiffigineqarneq ajorput, Inatsisartulli ataatsimiittarfianni oqallisigineqarnissaat siunertaasarluni.

Nunaqarfinni isorliunerusuni najugallit illoqarfinnut annernut nuukkusuttut qanoq iliorfigineqartassanersut Demokraatineersup Marie Fleischerip oqallisissatut siunnersuutigaa.

Tamatumunnga atatillugu suleqatigiissitaliortoqarnissaa Demokraatinit kissaatigineqarpoq, siunnersuusiornissaq suleqatigiissitap isumagissavaa.

Siunnersuulli taanna partiit allat tapersersunngilaat.

Atassummiit tamatumunnga oqartoqarpoq, nunaqarfimmi najugallit qasserpiaat illoqarfinnut annernut nuukkumanersut kisitsisaatigineqanngitsoq.

Kisitsisillu saqqummiunneqarnissaat Atassummit siunnersuutigineqarpoq.

Siunnersuut taanna Naalakkersuisut siulittaasuanit, Hans Enoksenimit, taperserneqarpoq.