Nunaqarfiit peqatigiiffiat: Nunaqarfinni ATV-nermi biilernermut allagartaq piumasaqaataajunnaarli

Kalaallit Nunaanni nunaqarfiit 60-it missaanniipput. Taakkua illoqarfinnituulli aqqusinerissaartiginngillat. Taamaattumik qamutit motorillit, ATV-t, atorlugit assartuisoqakkajuppoq.

Taakkuninngali ingerlatitsissagaanni bilinut ingerlatitsisinnaanermut allagartaqarnissaq inatsisaavoq.

Piumasaqaat nunaqarfiit peqatigiiffiata KANUNUPE-p peerusuppaa.

- Aqquserngit taakkua atorneqartut nunaqarfinni ima pitsaanngitsigipput illoqarfinnituut aqquserngit innatik. Taamaalillunilu pisariaqarsorinarani allagartalersorneqarnissaat ATV-nut aqutsinissamik, peqatigiiffimmi siulittaasuusimasoq Ove Villadsen KNR-mut oqarpoq.

AAMMA ATUARUK Nunaqarfiit peqatigiiffiat: Anartarfiit puussiartallit atorunnaartariaqarpagut

Ingerlatitsinissamut allagartamik piumasaqaat nunaqarfiit ilaannut ima ajornartorsiutaasartigaaq, allaat anartarfiit puussiartaleqqittakkat eqqaaviillu eqqaaveqarfinnut ingerlanneqarsinnaasaratik.

Aqquserngillu sinaani arlalissuanngorlutik tippaallutik katersuutilersarlutik.

- Eqqaasarnermut tunngatillugu assartuisinnaaneq unittarami, taanna oqarpoq.

Nunaqarfinni ATV-nik ingerlatitserusuttut biilinut ingerlatitsisinnaanissaannik ilinniartinneqarsinnaanerat ajornartorsiutitaqarpoq, taassuma ilanngullugu oqaatigaa.

- Nunaqarfinni sulisorisagut taamatut allangartaqartinniarneqaraluarlutik ilaanni ajornartorsiutigisarpaat angusisinnaaneq ajoramik illoqarfinni bilertarnerup assiganik.

AAMMA ATUARUK Nunaqarfiit Peqatigiiffiat siulittaasortaartoq

Naalakkersuisut kissaat naammassiumallugu Danmarkimi assartuinermut ministeriaqarfik suleqatigiissitamik pilersitseqatigigaat attaveqaasersuutinut naalakkersuisoq, Erik Jensen oqarpoq.

Isornartorsiorneqarnikuusoq

Suleqatigiissitap allagartaqaqqusaanerup atorunnaarsinneqarsinnaanera misissussavaa, tamanna aatsaat siullermeertumik isornartorsiorneqanngilaq.

Nunatsinni ATV-mik ingerlatsinissamut allagartartaarnissamut piumasaqaatit Siumumit Inatsisartunut ilaasortap, Henrik Fleicherip 2017-imi apeqqutigai. Taanna taamani Partii Naleqqami ilaasortaavoq.

Apeqqut Erik Jensenimut taamani attaveqaasersuutinut naalakkersuisumut Erik Jensenimut apeqqutaavoq.

Erik Jensenillu naalakkersuisut danskillu naalakkersuisuisa akornanni suleqatigiissitaq malittarisassanik misissuisoq aqqutigalugu oqaloqatigiittut akissutigaa.

Ukiut pingasut qaangiuttut 2020-mi Inuit Ataqatigiinnit folketingimut ilaasortap, Aaja Chemnitz Larsenip suliaq allakkatigut angallannermut ministerimut, Benny Engelbrechtimut (S) apeqquteqaatigalugu qaqippaa.

Suleqatigiissitaq suliamik misissuilluni taamani suli aallartissimanngilaq. Suleqatigiissitaq maanna misissuivoq, ukiullu affaanut ataasiarluni ataatsimiittoqartartoq, Erik Jensen KNR-imut oqarpoq.

- Politimestereqarfik kommuninilu qinikkat qanimut suleqatigeqqissaarpagut, attaveqaasersuutinut naalakkersuisoq oqarpoq.

ATV malittarisassat biilinut atuuttut assigalugit nalunaarsorneqassaaq.