Nunaqarfiit Peqatigiiffiat siulittaasortaartoq
Ove Villadsen Kalaallit Nunaanni Nunaqarfiit Peqatigiiffianni, KANUNUPE-mi, ukioq ataasingajak siulittaasooreerluni, tunuarpoq. Taanna suliffiutiminut piffissaqarnerujumavoq.
Aappilattormiu Karl Petersen immikkut ittumik ataatsimiinnermi siulittaasunngorluni tallimanngornermi septembarip qulingiluaanni nalunaarpoq.
Taassumalu peqatigiiffimmi ataatsimeersuarnermi kingullermi siunniussatut aalaajangiussat nangillugit suliarissavai.
AAMMA ATUARUK Nunaqarfiit peqatigiiffiat: Anartarfiit puussiartallit atorunnaartariaqarpagut
Tassalu assersuutigalugit inoqarfiit pillugit ataatsimeersuarnermi oqallisigineqartut naammassineqatserlugit malersortarniarlugit, taanna oqarpoq.
- Kalaallit Nunaat tamakkerlugu nunaqarfinni siulersuisut ataatsimeersuarneranni suliakkiutigineqartartut uanga siulittaasutut suliarisussaassavakka, ilaatigut ataatsimeersuarnerni ima ittuni saqqummiussat sutigut allorriaatiginissaat malersortalugit. Taamatut pilersaaruteqarpunga.
Kalaallit Nunaanni Nunaqarfiit Peqatigiiffiata, KANUNUPE-p, siulittaasortaava Karl Petersen taama oqarpoq.
Nunatsinni nunaqarfiit 54-iusut Nunatsinni Naatsorsueqqissaartarfiup kisitsisaatai naapertorlugut katillugit maanna 6.971-inik juulip aallaqqaataani inoqarput, taaakkualu nunatta inuisa 12,3 procenteraat.
