Nunaqarfiit peqatigiiffiat: Anartarfiit puussiartallit atorunnaartariaqarpagut

Naalakkersuisut, borgmesterit, nunaqarfinni aqutsisut, najukkani ataatsimiititaliat, atorfilittallu Ilulissani ulluni makkunani ataatsimeersuarput. Taakkua oqallinneranni nunaqarfinni anartarfiit puussiartaleqqittakkat initoqaat.

Kalaallit Nunaanni Nunaqarfiit Peqatigiiffianni siulittaasup, Ove Villadsenip, nunaqarfiit imermik minguitsumik pilersorneqarluartut, nusuinnartakkanik sukkanerpaamik anartarfilerneqarnissaat Naalakkersuisunut kommuninullu kissaatigaa.

Tamannali uisorerneriinnarmi pisinnaanngilaq. Anartarfiimmi puussiartaleqqittakkat qanoq ittunik taarserneqarnissaat pillugit misissuisoqaleruttorpoq. Tamannalu aappaagu ukiup naanissaata tungaanut pissasoq, avatangiisinut naalakkersuisoq oqarpoq.

- Taannalu aallaavigalugu anartarfeqarnikkut siunissami aaqqiinissat, aamma nunaqarfinni, pilersaarusiorneqartariaqalissapput. Ullumikkut aaqqiissutaasoq atorsinnaanngilaq, ajorpoq, Kalistat Lund, Inuit Ataqatigiinneersoq KNR-mut oqarpoq.

Pitsaanngitsoq pitsaanerlu paasereeraat

Misissuineq 2016-mili aallartittoq taanna aamma oqarpoq.

Puussiartaleqqittakkanut taarsiullugit atorsinnaasutut naalakkersuisut misissortitaat tassaapput, siparnit puussiartaqanngitsut imermik salittakkat, anartarfiit imaannik gassi atorlugu ikuallaasartut kuutsittakkallu.

Misissuinermili anartafiit imaannik ikuallaasartut pitsaanngitsuusut paasineqareertoq, naalakkersuisoq oqarpoq. Taakkuami sarfamik atuisupilussuupput. Suna pitsaanerpaanersoq ilisimaneqalereersimagaluartoq suli misissuipput.

- Kuutsittakkanik taanna peqarnissaq pitsaanerpaajusussaagaluarpoq. Periarfissalinni tamakkua misissorneqassapput, Kalistat Lund oqarpoq.

Innaallagissiorfiit artorsartinneqarsinnaasut

Nunatsinni kommunini nunaqarfeqarnerpaami, Avannaata Kommuniani, kuutsittakkanik anartarfilersuisoqassagaluarpat aamma allamik ajornartorsiutissaqarlutik borgmesteriat oqarpoq.

- Uagut avannaani ajornartorsiutigigatsigu issittumiikkatta. Ruujorit ikkutagut kallerup inneranut ikkunneqartussaapput qerisuunnginnissaq eqqarsaatigalugu. Taava aamma innaallagissiorfiit nunaqarfinni assigiinngitsuni kivitsisinnaassusaat aporfiugami, attaviitsoq Palle Jerimiassen oqarpoq.

Taamaattumik Avannaata Kommuniata Naalakkersuisut aappaagu ukiup naanissaanut misissuinerat utaqqimaaqqaarusuppaat.