Nunanut allanut tunngasunut ministeri Bruxellesimiit Issittumi suliaqalissasoq

Naalagaaffeqatigiinneq Danmarkimut pingaaruteqarluinnarpoq, nunanut allanut tunngasunut naalakkersuisunngorlaaq, Jeppe Kofod (S) oqarpoq. Taanna EU-mi politikkimi suliaqareerluni Issittoq pillugu maanna aamma sulisussanngorpoq.
juulip 02-at 2019 12:16
Nutserisoq Connie Fontain

Danmarkimi nunanut allanut tunngasunut ministerinngorlaaq, Jeppe Kofod (S) qaammat ataaseq matuma siorna danskinit 188.757-init taaguunneqarluni ukiuni tallimani Europa-Parlamentimeeqqittussanngorpoq.

Taannali Bruxellesimiitsillugu statsministeri, Mette Frederiksen pingasunngornermi unnukkut nalunaaqutaq 23-p missaani sianerpoq.

AAMMA ATUARUK Danmarkimi naalakkersuisunngortussat saqqummiunneqartut

- Nunamit nunanut allanut tunngasunut ministerinngoqquneqarluni saaffigineqarama, uangalu Danmark sinnerlugu nunarsuup sinnerani allannguutaasinnasumik sulisinnaallunga,  taava angerpunga. Ministeriuneq suliassaavoq immikkuullarilluinnartoq. Tamannami ‘inuiannut sullissisuunermik’ piviusumik isumaqarpoq, taamaaliussaangalu, Jeppe Kofod oqarpoq.

BLÅ BOG - nunanut allanut tunngasunut ministeri, Jeppe Kofod

 

 

Ateq: Jeppe Kofod

Ukiut: 45 år

Tunuliaqutaq: Bornholmimi peroriartorpoq. Bornholmimi Amtsgymnasiumimi 1993-imi ilinniarnertuunngorpoq.

Poltikkikkut suliai: Folketingimi1998-imit 2014-mut ilaasortaq, tassani europamut nunanullu allanut tunngasuni ilaatigut oqaaseqartartuuvoq, kiisalu Kalaallit Nunaannut tunngasuni ataatsimiititaliami ilaasortaasimalluni. Europaparlamentimut 2014-imi aamma 2019-mi qinigaavoq.

 

Jeppe Kofodip Folketingimi oqaaseqartartuuffigisaminit tamanit  2008-mi tunuarpoq. Tamanna Jeppe Kofodip taamani 34-nik ukioqartup Socialdemokraatit inuusuttaannit SDU-mit niviarsiaqqamik 15-inik ukiulimmik atoqateqarsimaneranik aallaaveqarpoq.

 

Naalagaaffeqatigiinneq pingaaruteqarluinnartoq

Jeppe Kofod nunanut allanut tunngasunut ministereqarfimmi sulinermini ullormi siullermi suliassanut tunngasunik oqaaseqarusunngilaq. Naalagaaffeqatigiinnerli Danmarkilu imminut pingaaruteqarluinnartut erseqqissaatigaa.

- Kalaallit Nunaannik Savalimmiunillu naalagaaffeqateqarnerput naleqartilluinnarpara. Tamatumami Danmarkimi kikkuunitsinnut ilusilerpaa. Tamannalu ineriartorteqqinniarlugu eqqarsarpunga.

Socialdemokraatit siulittaasuata maannalu statsministerip, Mette Frederiksenip nunanut allanut tunngasunut politikkimi Nunatta kiffaanngissuseqarnerulernissaanut periarfissat misissornissaanut piareersimalluni marsimi apersorneqarnermini KNR-imut oqaatigaa.

AAMMA ATUARUK Kalaallit Nunaat nunanut allanut politikkikkut piginnaaneqarnerusariaqarpoq

- Nunanut allanut politikkimut tunngatillugu oqaasissaqartitaanerulernissaq annertuumik kissaatigineqartoq tusaraangakku, taava isumaliortarpunga eqqornerussasoq oqassalluni: ’Issiaqatigiilluta oqaloqatigiissutigisigu: Suliaqarfinni isumaqatigiissutigivissunngisatta ilaani periarfissaqarnerulersitsisinnaavugut?' Mette Frederiksen taamani taama oqarpoq.

Nunanut allanut tunngasunut ministerinngortup kalaallit savalimmiormiullu naalagaaffeqatigiinnerup sinaakkutai pillugit aallaqqaammut oqalliseqatigeqqaarniarpai.

AAMMA ATUARUK Nunatta Savalimmiullu kiffaanngissuseqarnerusumik periarfissaqarnissaat Løkkep misissorniaraa

- Kalaallit savalimmiormiullu ikinngutivut ataqqillugit suliassat uku tamaasa maanna iserfigiligassavut pillugit tusagassiuutinut oqaaseqarnissara utaqqikkassallavara, Jeppe Kofoed oqarpoq.