Demokraatit Atassullu: Nunanit allanit peqqinnissamut ikioqqusariaqarpugut - maanna!
- Susassaqarfimmut tassunga soorunami suleqatiginnikkusuppugut, ministeriuneq Mette Frederiksen (S) KNR-imut Folketingimut siorna ukiakkut qineqqusaarnermi oqarpoq.
Taanna Danmarkimi naalakkersuisunngortitsisoqarpat siuttuussaguni Peqqinnissaqarfimmut ikiuerusunnerlutik aperineqarami taama akivoq.
Ingammik Danmarkimit peqqinnissamut ikioqqusariaqartugut, Inatsisartuni partiini amerlanerussuteqartut Folketingimut siorna qineqqusaarnermi oqaatigaat.
Paasisavulli naapertorlugit Folketingimut siorna qinersinitsinniilli Danmarkimit ikioqqusimanerlutik Naalakkersuisut Inatsisartut Ilaqutariinnut Peqqissutsimullu Ataatsimiititaliaannut ilisimatitsisimanngillat.
Kisianni Peqqissutsimut Naalakkersuisoqarfik peqqinnissamik aaqqissuusseqqinnissamik Inatsisartunut isumaqatigiinniariartoqquseqqammerpoq. Partiilli tamalluunniit Naalakkersuisuniit siunnersuummik saqqummiivigineqanngillat.
Atassutillu siulittaasuata, Aqqalu Jerimiassenip, Naalakkersuisut qanoq iliortariaqarnerarlugit isornartorsiorpai.
- Sorpassuarnik neriorsuipput. Maannamulli iliuusikippallaarput. Danmarkimiit ikioqqussanersugut naalakkersuisullu oqaloqatigiissutigisariaqarparput.
Nunamit sorlermit ikiorneqassanersugut, Aqqalu Jeriamiassenip apeqqutaatinngilaa.
- Nunamit sorlermit ikiorneqarnersugut apeqqutaatinngilara. Peqqinnissamut ikiorneqarutta naammagaara. Ikiorneqarnissatta angunissaa pingaartinneruara.
Naalakkersuisut peqqinnissamut ikioqqunissamut paamaarpallaartut, Inatsisartut peqqissutsimut ataatsimiititaliaani ilaasortaq Demokraatineersoq, Bjørk Lange Olsen, aamma isumaqarpoq.
- Qanoq iliuuseqangaarsimarpasinngillat. Neriorsuutitik timitalinngilaat.
Atassut: Aningaasanik allamiit Peqqinnissaqarfimmut nuutsisa
Danmark nunatsinni peqqinnissamut akisussaaleqqissasoq, Atassutip Folketingimut qineqqusaarutigaa. Partiimik tamanna suli pingaartikkaa, siulittaasoq oqarpoq.
Atassulli partiinit allanit taperserneqannginnami nunatta karsia tamatumunnga aallerfigineqassasoq kissaatigaa. Assersuutigalugu inatsit tunngaviusussatut siunnersuutip suliarinissaanut aningaasat immikkoortitat nuunneqassasut siunnersuutigaa, oqarluni oqallinneq taanna kinguartissinnaakutsoortoq.
- Inuk qitiutillugu tassani isiginialaartariaqarparput, tassa inuup inuunera. Uani pingaarnerpaatut isigisariaqarparput Peqqinnissaqarfik aamma inuiaqatigiit qitiatut taaneqarsinnaagami tassani inuiaqatigiit peqqissuussappata, Aqqalu Jerimiassen oqarpoq.
Peqqinnissaqarfiup nutaanik attaveqaatitaarnissaanut 100 millionit koruunit ukiuni sisamani atugassatut, Peqqinnissaqarfimmut sulisussarsiornermut 2 millionit koruunit 2024-mut aningaasanut inatsimmit illikartinneqassasut Peqqinnissaqarfimmilu sulisunut inissianut aningaasaliinerunissaq, Naalakkersuisoqatigiit siunnersuutigaat.
Aningaasalli taakku suminngaanniit aaneqassanersut, siunnersuumminni allanngilaat.
Majoriarli aningaasanik aallerfiusinnaasoq, Atassut isumaqarpoq. 59 millionit koruuningajaat Majoriamut ukioq manna aappaagulu illikartinneqarput.
- Maanna sulisussameerpugut, illuatungaani sooq taava taamarsuaq Majoriamut atuisoqartassava? Aningaasanik Majoriamiit Peqqinnissqarfimmut arlaatigut nuutsisinnaasariaqarpugut, Atassutip siulittaasua oqarpoq.
Assersuutigalugu kalaallit Danmarkimi Rigshospitalimuinnaanngitsoq aammali Danmarkimi napparsimmavinnut allanut aamma peqqissariarsinnaaqqullugit Naalakkersuisut Danmark peqqinnissamut tunngasuni suleqatiginerusariaqaraat, Demokraatineersoq Bjørk Lange Olsen aamma isumaqarpoq.
Nunarpulli peqqinnissamut tunngasuni pingaarnersiuinerunissamut nammineq aamma iliuuseqarnerusinnaavoq. Aningaasanillu allaffissornermiit peqqinnissamut nuutsitsinikkut taamaaliorsinnaasoq, Bjørk Lange Olsen oqarpoq.
- Allaffissorneruleralutinnarpugut. Tamanna periarfissaanersoq siullertut misissorusupparput.
Naalakkersuisut oqaaseqarumanngitsut
Peqqissutsimut naalakkersuisoqarfik IA-p 2022-mi apriilimili akisussaaffigilerpaa.
Kalaallit kræftertut Danmarkimi peqqiissaaveqalernissaannut aningaasaliinissaq, kalaallit Danmarkimi napparsimmaviit arlaannulluunniit peqqissariarsinnaalernissaat taakkununngalu Danmarkimi allamik peqqissaaveqalernissaa, IA-p Folketingimut qineqqusaarutigai.
Nunatta Danmarkillu peqqinnissamut tunngasuni suleqatigiinnerulernissamik isumaqatigiinniarnerat unittooqqasoq, Folketingimi ilaasortaq IA-meersoq Aaja Chemnitz (IA) qanittukkut oqarpoq. Tamannali IA-p naalakkersuisullu peqqinnissaq pillugu politikkilioqqaartussaanerannik ilaatigut peqquteqarpoq.
Peqqissutsimut naalakkersunngoqqammertoq, Agathe Fontain (IA) tamanna pillugu oqaloqatiginiarlugu sapaatit akunnera ataaseq sinnerlugu matuma siornali attavigaarput, sulili akinngilaatigut.
Siumut Danmarkimit peqqinnissamut ikioqqusariaqarnitsinnut akerliusutuaavoq. Siumut peqqinnissamut tunngasuni qanoq iliulersaarnersoq Inatsisartut Ilaqutariinnut Peqqissutsimullu Ataatsimiititaliaata siulittaasua Siumumeersoq Mala Høy Kúko aperigatsinni oqaaseqarumanani oqarpoq.
Naalakkersuisulli USA-mik peqqinnissamut tunngasuni suleqateqalernissaq orniginartikkaat, nunanut allanut tunngasuni naalakkersuisoq Vivian Motzfeldt (S) qanittukkut ilisimatitsivoq.