Politikkikkut immikkut ilisimasalik: Nunamik allamik inuiannik toqoraasimaneraaneq sakkortunerpaat ilaanniippoq

Naalakkersuisut Danmarkimut oqarluartaarutinik sakkortuunik piffissami kingullermi tulleriiaaginnavinnik nassiussuipput.

Danmarkip naalagaaffia kalaallinut inuiannut nungusaaniarsimasoq Naalakkersuisut siulittasuat Múte B. Egede DR-ip aallakaatittagaani Deadlinemi oqarmat ilaatigut Christiansborgimi uissuummissutaaqaaq.

- Danskit naalagaaffiannit iliuuserineqarsimasoq inuiaannik nungusaaneruvoq. Maannakkut taama oqarneq tunngavissaqarpoq, Naalakkersuisut siulittaasuat oqarpoq.

Oqaatsillu taakku imaaliallaannaq atorneqarneq ajorput. Tassami Kalaallit Nunaat Danmark inuiannik nungusaanerarlugu pisortatigoortumik oqarnera uani pineqartoq, naalakkersuineq pillugu oqallinnermik immikkut ilisimasalik Ineqi Kielsen erseqqissaavoq.

- Oqaaseq atorneqartoq "inuiannik toqoraasimaneq", taanna oqaaseq nunarsuarmioqatigiit akornanni annertoorujussuarmik mianeralugu atorneqartarpoq. Taamaattumik naalagaaffimmut immaqa sakkortunerpaaffiit ilaattut taaneqarsinnaavoq, Ineqi Kielsen oqarpoq.

Múte B. Egedep taama oqarnera Danmarkimi nunatsinnilu uissuummissutaammata tupinnanngitsoq, taanna aamma oqarpoq.

Sivisuumik naammaginninngitsut

Taannali Danmarkimut appissaluussissutituaanngilaq. Isumaginninnermut naalakkersuisoq ullormi Múte B. Egede taama oqaaseqarfiani kamalluni aamma oqaseqarpoq. Sakkortoorujussuarmik oqaluttuarisaanermi naalakkersuinikkut aporaanneq aallartilersoq, taanna isumaqarluni oqarpoq.

Angajoqqaat piginnaasaannik misissuinermi atorneqartartut aassuarisaasut atorunnaarsinniarlugu Danmark iliuusikippallaartoq, taakkua pillugit qallunaat isumaginninnermut ministeriannik Sophie Hæstorp Andersenimik ataatsimeeqateqareerluni oqarpoq.

- Uanga isumaqarpunga, siunissami qanilaartumik suleqatigiissinnaanermut apeqqutinut tamanut mattussiartorneq uani poitikkikkut aallartinneqartoq. Maannakkut naalakkersuisoqatigiit Danmarkimi kusanaatsorujussuarmik ingerlatsinerisa saniatigut kikkulluuunniit naalakkersuisuugaangamik apeqqutit tamakku aaqqipallattannginneri, isumaqarpunga inuiaat kalaallit aamma nutaamik isummersulernerannik aallartitsissasoq, Aqqaluaq B. Egede oqarpoq.

Danmarkip Kalaallit Nunaannik kalaallinillu pinninneranik naammaginninnginneq sivisuumik aamaartuusisimasoq taanna naliliivoq.

- Nunap inoqqaavisut akuerineqarnikutut inissisimannginneq pissutigalugu naalagaaffimmi oqartussaasunit allamik kultureqaraluarlutik qallunaatut isigisaasarneq aamma annertoorujussuarmik oqallisaavoq, Ineqi Kielsen oqarpoq.

Tamanna assersuutigalugu kalaallit meeqqat allamut inissinneqassanerannik apeqqutini angajoqqaat piginnaasaannik misissuutinut tunngavoq. Taakku kalaallit kulturiannik aallaaveqanngineralugit isornartorsiugaapput.

Qinersisoqangajalersoq

Aamma Kalaallit Nunaat Danmarkimit naligisutut isigineqanngitsutut misigisarnermut tunngavoq. Naalakkersuisullu tamanna pillugu sakkortuulioreersut, Ineqi Kielsenip erseqqissaatigaa.

- Kalaallit Nunaata naligiissitaanngimmat, sakkortuumik titarniliisoq nunat avannarliit suleqatigiinneranni takuarput. Nunarput ataqqineqartariaqartoq uani takoqqipparput 

Tassalu naammangittaaanneq tusartareerparput. Kisianni IA-meersut naalakkersuisut marluk oqarluartaarnerisa piffiat maluginngitsuugassaanngilaq.

- Soorunami qinersinissaq qanilliartorpoq, takutitaqartariaqarnerlu annertusiartorpoq. Kisianni aamma soorunami Inuit Ataqatigiit isumaginninnermut tunngasunik annertoorujussuarmik pingaartitsineq ukiuni atuunnerminni ilisarnaatigisimavaat. Aamma tupinnanngitsumik uani sammivaat, Ineqi Kielsen oqarpoq.