Nuka Amiinnaq angerlarsimaffeqanngitsoq initaarusuppoq suliffittaarusullunilu
Nuka Amiinnaq 36-nik ukioqarpoq Nuummilu angerlarsimaffeqanngitsuulluni.
Taanna KNR-mit Kofoeds Skolemut pulaarnitsinni naapikkatsinni inussiarnersumik ilassivaatigut. Angerlarsimaffeqanngitsuunerup kingunerisaanik atugarissaartuunnginnera timaani kiinaanilu malunnarput, Nukallu suna pissutigalugu angerlarsimaffeerussimanini oqaluttuaraa:
- Imerajunneq ikiaroorujunnerlu peqqutigalugit angerlarsimaffeqanngilanga.
Nunatsinni angerlarsimaffeqanngitsut katillutik 491-iunerat nalunaarusiami saqqummiunneqareersorlu KNR-imit Kofoeds Skolermiut pulaarpagut. Angerlarsimaffeqanngitsunik kisitsisitsisuupput Naalakkersuisut, Ilisimatusarfimmilu ilisimatusartut kisitsisuupput.
Angerlarsimaffeqanngitsut amerlanersaat angutaasut misissuinerup ersersippaa. Angutit angerlarsimaffeqanngitsut 350-iusut arnallu angerlarsimaffeqanngitsut 135-iusut nalunaarusiami atuarneqarsinnaavoq.
Kalaallit Nunaanni angerlarsimaffeqanngitsut
- Nunatsinni angerlarsimaffeqanngitsit 491-pput, taama kisitsineq takutsitsivoq
- Illoqarfiit aqqanillit kisitsiffigineqarput.
- Angerlarsimaffeqanngitsut amerlanersaat Nuummiipput.
- 293-it angerlarsimaffeqangitsuunerat takujuminaappoq, ilaquttani, qanigisani, ikinngutini kialaarfinnilu unnuisartuummata.
- 183-it takussaasumik angerlarsimaffeqanngitsuupput, taakku aqqusinerni inissiallu majuartarfeqarfiini, kialaarfinni, illuni inoqanngitsuni, tuperni umiatsianilu unnuisartuupput
- Kisitsinermi angerlarsimaffeqanngitsut 15-it sumiittarnersut paasineqanngilaq.
- Angerlarsimaffeqanngitsut kisinneqartunit amerlanerusinnaasut nalunaarusiami allaqqavoq.
- Angutit 356-it arnallu135-t angerlarsimaffeqanngitsuupput.
- Angerlarsimaffeqanngitsut 343-t 30-60-illu akornanni ukioqarput. 18 -29-llu akornanni ukiulinni 80-it angerlarsimaffeqanngillat, angerlarsimaffeqanngitsunilu 68-t 60-ileereersimasuupput.
Tusarfik: Kalaallit Nunaanni angerlarsimaffeqanngitsunik kisitsineq
Ilungersunarlunilu assoroornarpoq
Nuka Amiinnaq oqaluttuarpoq meeraallunili angerlarsimaffeeruttarsimalluni.
-Ilungernunalaarpoq assoruunnalaarlunilu. Siornatigut sumi tamaaniikkajuppunga, tummeqqani, umiatsiani, allani kammaalaatinnilu unnuisarpunga. Kingusiinnaa Kialaarfimmi aatsaat unnuisalerpunga, kisianni aamma ilaatigut iseqqusaajunnaartarlunga.
Nukalu nangippoq:
- Iliuuseqartorsuuneq ajorpunga, kisianni oqaloqatiginnittarpunga taavalu manngertisimarujoorlunga, soorlu ulloq qanoq ingerlassanersoq mersernartarluni.
Nukallu siunissani eqqarsaatigalugu pilersaaruteqartaraluarnerarpoq:
- Pilersaaruteqartaraluarpunga, kisianni piviusunngorneq ajorput. Piviusunngortarluarput kisianni uneqqittuaannarpunga.
Aperaarput unittoortarnerminut suut peqqutaanerpaasarnersut, akivorlu:
-Angerlarsimaffeqannginneq, ikiaroorajunneq, imerajunneq, ilaquttannit soorlu tapersersorneqannginnerujussuaq aningaasat tungaatigut, inissat tungaatigut. Sulileqqittaraluarpunga kisianni aamma suliunnaartuaannarpunga.
AAMMA ATUARUK Angerlarsimaffeqanngitsunik misissueqataasoq: Nakkaaterujussuarsinnaasarput
Nuka aperaarput inuunermini suna kissaatiginerpaaneraa, akivorlu:
- Illu, taanna kissaatigisanni initunerpaajuvoq. Imatut eqqarsartarpunga - initaartuuguma - immaqa imminut inuunera iluarsaallugu imaluunniit initaartuuguma sulinerussagaluarpunga, ilinniarusunngikkuma sulillungaa - sulerusunngikkuma ilinniarlunga, immaqa taamaassagaluarpunga.
Ajattugaasutut misigisarpoq
Ilisimatusarfimmiut angerlarsimaffeqanngittarneq pillugu nalunaarusiiaat saqqummiunneqaqqammeraluartoq Nuka Amiinnaq isumalluarpallaanngitsoq ima oqarpoq:
- Aasimmiaa taamatut. Taamamiaa kinguneqangaassanngillat. Soorlu suliaat, iliuusaat kingunerilu uannut malunnarneq ajorput. Radioinnakkut, tv-ginnakkut takusarlugit tusaasarlugit oqaluttut, imatorsuarlu annguttoqassanani uannut, uagutsinnut angerlarsimaffeqanngitsunut.
Ilinniagaqarnissamut suliffeqarnissamullu akornusiisarpoq
Kofoeds Skolemi aamma naapipparput 26-nik ukiulik Qisunnguaq Karlsen. Taanna aamma namminerisaminik initaarusukkaluarpoq, allatullu nalinginnaasumik inuuneqalerusukkaluarluni.
-Ilinnialeraluarama atuarlunga. karakteerikka Piareersarfimmi qaffassarlugit, iluatsinngitsumillu atuarunnaartitaavunga procenteqarpalaarnera pissutaalluni.
AAMMA ATUARUK Ilisimatuut paasisaat: Inuit 500-t missaanniittut angerlarsimaffeqanngillat
Qisuannguaq oqaluttuarpoq ilaquttamini maanna unnuisarluni. Massakkut inissisimanini siunissamullu pilersaarutini ataqatigiissippiarsinnaannginnerarpai:
-Nammineq ineqarsimasuuguma piumassusera annertunerusimassagaluarpoq ilinniarnissap tungaatigut suliffissalluunniit tungaatigut. Nukissaqarnerussagaluarpunga immaqa privateqanerulaartuuguma.
- Suliffissarsiunnginnama qanittumi, aamma imminut piumaffigeqqanngilaarnermut. Suliffissarioriaannaagaluarpunga unittooqqanarnermut, ikiaroornartumik aamma atuisuugama.
- Ikiorneqarusukkaluarpunga, tusaaneqarnerulaarusukkaluarpunga. Ilaanni oqaluuserineqarluni tusaasoorlugulu misiginartarami soorlu ajattorneqarluni. Timikkut aamma nakkkartoornartarami assut. Immaqa tapersersorneqarnerulaartuugutta nukkannarnerulaassagaluarpoq qamuuna ilukkut, Qisunnguaq Karlsen oqarpoq.
