Angerlarsimaffeqanngitsunik misissueqataasoq: Nakkaaterujussuarsinnaasarput
Nunatsinni angerlarsimaffeqanngitsut qanoq amerlatigineri siullerpaamik misissorneqarpoq.
Ilisimatusarfimmit ilisimatusartut eqimattat nunarput tamakkerlugu angerlarsimaffeqanngitsut naatsorsorpaat. Nunatsinnit angerlarsimaffeqanngitsut 491-iusut paasineqarput. Tamaalilluni nunatsinni innuttaasut 100-juugunik ataaseq angerlarsimaffeqanngitsuusarpoq.
Nunatsinni angerlarsimaffeqanngitsut
- Nunatsinni angerlarsimaffeqanngitsut 491-iuppput.
- Nuna tamakkerlugu angerlarsimaffeqanngitsunik misissuineq illoqarfinni aqqanilinni misissuiffigineqarpoq.
- Inuit 293-it takussaanngitsumik angerlarsimaffeqanngitsutut inuupput. Soorlu innuttaasut unnuisarfinni assigusunilu allani atuisut.
- Inuit 183-it takussaanerusumik angerlarsimaffeqanngitsutu inuupput, taakku silami, najugaqarfiit torsuusaanni, angerlarsimaffeqanngitsut unnuisarfianni, najugaqarfikunik toqqinillu unnuisarput.
- Angerlarsimaffeqanngitsut sinneri 15-it ersarissumik paasissutissartaqanngillat.
- Nalunaarsorneqartut saniatigut allanik aamma angerlarsimaffeqanngitsoqarsinnaasoq nalunaarusiami maluginiaqquneqarpoq aamma.
- Angerlarsimaffeqanngitsunit 356-it angutaapput, 135-t arnaallutik.
- Inuit 30-t 60-illu akornanni ukiullit angerlarsimaffeqanngitsut 343-pput. 18-iniit 29-nik ukiullit 80-iullutik. 60-ileereernikut 68-iullutik.
Angerlarsimaffeqanngitsullu oqaluuserineqarnissaat pingaaruteqartoq, misissueqataasoq Steven Arnfjord oqarpoq.
AAMMA ATUARUK Ilisimatuut paasisaat: Inuit 500-t missaanniittut angerlarsimaffeqanngillat
- Angerlarsimaffeqanngittarnerup malunnartorujussuanngorsimanera sammineranut peqqutaavoq. Angerlarsimaffeqanngittarneq inuppassuarnit assut maluginiarneqariartorpoq.
- Angerlarsimaffeqannginneq ersarinnerujussuanngorsimavoq. Inuit ineqarniarnikkut ajornakusoortitsingaatsiartut amerlasuunut malunnarsisimavoq, , Ilisimatusarfimmi inuiaqatigiilerinermut, aningaasarsiornermut tusagassiornermullu immikkoortortami lektori, Steven Arnfjord oqarpoq.
Ilisimatusartut illoqarfiit aqqanillit misissuinerminni tikippaat, taakkunani angerlarsimaffeqanngitsunut unnuisarfiit kialaartarfiillu pulaarneqarlutillu aqqusinermi angalaartartut oqaloqatigineqarput. Aamma kommunip innuttaasut najugaqanngitsutut nalunaarsorsimasaat pillugit paasissutissarsillutik.
Aamma angerlarsimaffeqanngitsut unnuami taartumi siniffigisinnaasaannut majuartarfeqarfinnut alakkarterisarsimallutik.
- Ilaatigut ullaassakkut pingasunut makittarpugut Nuummilu assersuutigalugu Radiop Qaqqaani inissiaqarfimmukartarluta majuartareqarfinni sinittoqarnersoq misissortarpagut. Steven Arnfjord nassuiaavoq.
Angutaanerusut
Angerlarsimaffeqanngitsut amerlanersaat ilisimatusartut “ersinngitsumik angerlarsimaffeqanngitsuunermiittutut” taagugaat 300-t missaanniipput.
Taakku tassaapput inuit najugaqanngitsutut nalunaarsorsimasut, ilaquttaminnili ikinngutiminnilu unnuisartut, taakkulu taamaalillutik aqqusinermi takussaaneq ajorput.
Angutillu 30-niit 60-inut ukiullit angerlarsimaffeqanngitsut amerlanersaraat. Angutit ikiortissarsiorusunnginnerusarnerannik tamanna pissuteqartoq, Steven Arnfjord naliliivoq.
AAMMA ATUARUK Angerlarsimaffeqanngitsut kisinneqalersut: Politikerit soqutiginerulissavaatigut
- Nunani allani angerlarsimaffeqanngitsut pillugit ilisimatusartut allat oqaloqatigigaangatsigit aamma taakkunani taamaannerartarpaat. tassa angutit ikioqqunissamut ungasinnerusarput taamaalillutillu nakkaaterujussuarsinnaasarlutik.
Taamaammat nunatsinni angerlarsimaffeqanngitsut pillugit iliuusissiaqarnissaa pisariaqarluinnartoq, amerlanerusunillu inissialiartoqarnissaa pisariaqartoq ilisimatusartoq oqarpoq.
- Tassa akissaqartitanik inissaqarnissaq eqqartorneqarpoq. Inissiarpassuarnik amigaateqarsimagatta inissaaleqisorpassuaqarpoq. Steven Arnfjord oqarpoq.
Angerlarsimaffeqanngitsuuneq pillugu paasisat asseqanngitsut
Pingaartumik Nuummi angerlarsimaffeqanngitsut amerlapput. Nunatsinni angerlarsimaffeqanngitsut amerlanerpaartaat Nuummi najugaqarput.
Naalakkersuisut angerlarsimaffeqannginneq pillugu nassiuaatitut oqaasertaliussaat:
Angerlarsimaffeqanngitsut sisamanut agguataarneqarput.
Takussaanerusumik angerlarsimaffeqanngitsuuneq, aqqusinerni, toqqini angerlarsimaffeqanngitsulluunniit unnuisarfianni sinittartut.
Takussaannginnerusumik angelarsimaffeqanngitsut najukkamik allattorsimaffimmiinngitsut, kammalaatiminni ilaquttaminnilluunniit sinittartut.
Angerlarsimaffeerunnissamut aarlerinartumiittut, soorlu inigisaminnik annaasaqariaannaasut, inuuniarnermikkut ilungersunartumik inissisimasut.
Angerlarsimaferruuteriaannaasut, inuit angerlarsimaffillit, kisianni tarnimikkut napparsimanertik pissutigalugu kisimiillutik najugaqarsinnaanngitsut.
Tamanna illoqarfiit ukiuni kingullerni alliartornerannik pissuteqarpoq, inuilli tamarmik illoqarfimmi inissarsinissaminnut periarfissaqanngillat. Taamaalillutillu angerlarsimaffeqanngitsunngortarlutik, Steven Arnfjord nassuiaavoq.
Nunatsinni angerlarsimaffeqanngitsunik kisitsinerup siulliunera pissutigalugu nunani issittumiittuni allani angerlarsimaffeqanngitsunut sanilliukkuminaapput.
Nunatsinnili angerlarsimaffeqanngitsut amerlanerungaatsiartut takussutissaqartoq, Steven Arnfjord oqarpoq, taanna maanna Alaskamut ilisimatusariartorluni angalavoq. Alaskami angerlarsimaffeqanngitsut innuttaasunit 300.000-init 1.500-pput. Tamannalu nunatsinnut angerlarsimaffeqanngitsut innuttaasut 1 procentiunerannut sanilliukkaanni qaffasinngilaq.
Taamaakkaluartorli sanilliussineq qularnarpoq, nunatsinnimi angerlarsimaffeqanngitsuuneq pillugu ilisimasat pitsaanerupput, kommunimmi inuit qanoq amerlatigisut najugaqanngitsuunerat nalunaarsortarpaat. Ilisimasallu taakku nunani allani periarfissaajuaannanngillat.
- Taamaammat nunani allani naatsorsuinerit angerlarsimaffeqanngitsut ersarissuinnaapput. Taakkulu amerlassusaat marloriaammik pingasoriaammillu ilallugu ineqarniarnermikkut ajornartorsiuteqartut naatsorsorneqarsinnaasoraakka, Steven Arnfjord oqarpoq.
