Nuilarmiut oqallissaarutitut saqqummiunneqartut

Nunatta ilisarnaataasa pinngaarnersaasa ilaat qalipaatigissut eriagisallu, arnat kalaallisuui, ullutsinni assigiinngitsutigut oqallisigineqartuarput. Eqqumiitsuliortup Jessie Kleemannip nuilarmiut tallisillugit oqallissaariniarluni saqqummersitsinerit ukioq manna annersaanni "The Weather Diaries"-imi Nuummi ulluni makkunani saqqummersippai.
Assi © : KNR
aggustip 11-at 2018 12:03

-Tallisinnera imaaginnarpoq taava sumut killeqassava? Sumut pissaagut? Qanorittunngussaagut?, eqqumiitsuliortoq Jessie Kleemann oqarpoq. Jessie Kleemannip Augustine (Akku) Poulsen, Gundine Sørensen, Karen Lergaard Lisa Storch Debora Pedersenilu suleqatigalugit nuilarmiut suliarai.

Arnat nuilarmiui 1860-ikkut missaanni suliarineqaqqaartalermata nipinngasutuinnaq sananeqartarput. Talliartornerisali isumaat ilisimatusartup Rosannguaq Rossenip ima nassuiarpaa:

- Sapannganut akissallit soorlu immaqa Kalaallit Nunaanni peqarnerit, immaqa soorlu pinerrarissunik uillit taamaasillutik KGH-mut pisiniarsinnaanerusut tamakkua siulliullutik takisuunik nuilarmioqartalersimapput tallisikkiartuaarlugit, soorlu akissaqalerlutillu sapannganillu pisillutik, Rosannguaq Rossen, kulturitsinni ilisarnaatit atorlugit atisalioriaaseq pillugu Ph.d-iliortoq, oqarpoq. 

Jessie Kleemannip Augustine (Akku) Poulsen, Gundine Sørensen, Karen Lergaard Lisa Storch Debora Pedersenilu suleqatigalugit nuilarmiut suliarai.

Namminersuleriartornermi killiffik

Nuilarmiut tallisinnerisa isumaat inuiaqatigiit namminersuleriartorneranni sumut killinnerannut tunngasoq, eqqumiitsuliortup Jessie Kleemannip nassuiarpaa:

- Inuiattut kinaassuserput nammineerluta suliareqqinniarlugu, soorlu kinaassuserput sorsuutigiuaannarnikuuarput. Aammalu namminersulerutta soorunalimi nunarput allanngorpat tunisassiorsinnaalerutta qanorluunniit iliorsinnaalerutta aningaasarsiornerup tungaatigut apeqqutit tassaniikkamik. Taava qanoq isikkoqalissava?

P.hd-iliortup Rosannguaq Rossenip nuilarmiut oqallinnermik aallartitsissasut neriuutigalugu oqaatigaa:

- Neriuppunga eqqartuititsissasoq, immaqa arnat assuutaat eqqarsaatiginerullugit, allanngortiterisinnaagaluartugut inatsiseqanngimmat. Neriuppunga oqallinneq aallartissasoq.

AAMMA ATUARUK Nordic Fashion Biennale tallimanngormat ammarneqarpoq

Saqqummersitsinermi "The Weather Diaries"-imi eqqumiitsuliortut Sarah Cooperip Nina Gorferillu Nunat Avannarliit Killerni mutilerinerup inuiaqatigiinni inissisimanera siunertaalu misissorpaat, piujuartitsiniarneq, silap pissusia, oqaluttuassalerineq, kulturikkut kingornussat nutaaliornerullu pilersarnera ilanngullugit saqqummersitsinermi misissorneqarlutik.

Saqqummersitsineq Nuummi Eqqumiitsulianik Saqqummersitsivimmi novembarip 18-iata tungaanut takusarneqarsinnaassaaq.