Nordic Fashion Biennale tallimanngormat ammarneqarpoq

Avannaamioqatigiit illuat Reykjavimiittoq ukiut pingajussaanik atisanik ilusilersuineq pillugu saqqummersitsivoq - tamatumuuna tyskit illoqarfianni Frankfurtimi.
Allattoq mlk, Simon Uldum
marsip 24-at 2014 04:49

Amerikamiu assiliisartoq Sarah Cooper østrigimiorlu Nina Gorfer saqqummersitsinermik aaqqissuisuupput. Taakku ilaatigut atisanik ilusilersuisartut nunanit avannarlernit killerneersut aqqaneq-marluk atisaliaannik assiliisimapput. Atisanillu ilusilersuisartut nunatsinnit peqataasut tassaapput Bibi Chemnitz, Najannguaq Lennert, Nikolaj Kristensen aamma Jessie Kleemann.

Saqqummersitsineq taaguuteqartinneqarpoq ' The Weather Diaries' – Sila pillugu ullorsiutit. Nordic Fashion Biennale siullerpaamik nunat avannarliit killiit kisimiitillugit sammisaqarpoq. Assiliisartut Cooper aamma Gorfer ukiuni kingullerni marlunni Islandimi, nunatsinni Savalimmiunilu eqqumiitsuliornermik atisanillu ilusilersuinermik ilinnigaqarsimapput.

Atisanik ilusilersuisartut Frankfurtimi saqqummersitsinissamut tamarmik immikkut nutaanik ilusilersuisimapput, ilusilersugaallu ginet aammalu Cooperip Gorferillu assilisaatigut takutinneqarput.

Ilaatigullu atisanik ilusilersuisartup inuusuttup Bibi Chemnitzip puisip amianik ilusilersugai nutaat Nikolaj Kristensenillu sapangaaqqanik kjoleliai qarliliaalu takuneqarsinnaapput. Nikolaj Kristensen Upernaviup pigisaani nunaqarfimmit Nuussuarmeersuuvoq, ilaqutariinni ataataalluni sunngiffimminilu sapangaaqqat atorlugit kjolenik qarlinnillu kusarnartorsuarnik suliaqartarluni.

Saqqummersitsinermi ilusilersuisartut tamarmik immikkut ilusilersugaat aqqanillit taakkunanngalu assilisat takutinneqarput. Saqqummersinneqartut atuakkiami aamma saqqummersinneqarumaarput ilusilersuisartullu suliatik pillugit oqaluttuartinneqassallutik. Aammattaaq ilusilersuisartut oqaluttuaat aallaavigalugit saqqummersitsinermut atatillugu filmeeraliortoqarsimavoq.

Saqqummersitsinerullu saniatigut nunat avannarliit kulturikkut kingornussaat pillugit Museum Angewandte Kunstimi tallimanngormat oqallitsitsisoqarpoq.

Kalaallit peqataasut sisamat saniatigut aamma islandimeersut Mundi, Steinunn, Jör by GuðmundurJörundsson, Kría aamma Hrafnhildur Arnadòttir a.k.a. Shoplifter kiisalu savalimmiuneersut Guðrun & Guðrun, Barbara I Gongini aamma Rammatik saqqummersitsinermi peqataapput.

Frankfurtimi katersugaasivimmi Museum Angewandte Kunstimi saqqummersitsineq juunip 22-iata tungaanut takuniarneqarsinnaavoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk