Norgemi Rumaniamilu nakorsat peqqissaasullu Italiamukartut
![](/sites/default/files/styles/image_934x467/public/article_images/20200407-170543-l-1920x1280we.jpg?itok=vCBrMn5h)
EU Italiamut ikiuigasuaqqilerpoq. Italia coronavirusip nunarsuaq tamakkerlugu tunillaassuunnerata kingunerisaanik Europami nunani coronavirusimit eqqugaanerpaallunilu nualluummik taassuminnga toqquteqarfiunerpaavoq.
Europami nakorsarpaaluit peqqissaasorpaaluillu Norgimeersut Rumaniameersullu, Italiami peqqinnissaqarfimmi sulisut coronavirusimik siaruatsaaliinermik suliallit ikioriartorlugit, Italiami Milanomut Bergamomullu aallarasuarput.
Nakorsat peqqissaasullu taakkua EU-p ajunaarnersuaqarnermi ikiueqqaarnermut periusissiaa naapertorlugu Italiamukarasuarput.
AAMMA ATUARUK Nunarsuarmi inuit 788.000-it sinnerlugit coronavirusimik tunillatsissimasut
EU-p ataatsimiititaliarsuata ajornartoornermut siulittaasua, Janez Lenarcic, marlunngornermi taama nalunaaruteqarpoq.
- Italia coronavirusimit eqqugaaqisoq arajutsisimanngilarput.
- Italiali imminiiginnanngilarput. EU Italialu ersoqatigiipput. Nakorsat peqqissaasullu Italiami illoqarfinnut marlunnut coronavirusimit eqqugaaqisunut marlunngornermi aallarasuarput. Tamanna Europamiut ersoqatigiinnerannik ersersitsivoq, Janez Lenarcic oqarpoq.
Rumaniami nakorsat aqqanillit peqqissaasullu arfinillit Italiamukarasuarput. Rumaniami upalungaarsimasut immikkoortortaqarfianni aqutsisoq, Raed Arafat, taama nalunaaruteqartoq, nutaarsiassaqartitsivik AFP allappoq.