Niviaq Korneliussen imminut toquttoqartarnera pillugu: Paquminartuussanngilaq
Atuakkiortup, Niviaq Korneliussenip atukkiani ”Naasuliardarpi” saqqummerseqqammerpaa.
Atuagaq Tasiilami nunap ilaanut atsiussaavoq, Atuakkami arnaq inuttaavoq, tassani imminut toqunneq, asanninneq, ikinngutigiinneq aliasunnerlu sammineqarput.
Taassumalu atuakkiamini imminut toquttoqartarnerani ukkatarinninnera nalaatsornerinnanngilaq, sammisarmi taanna ukkatarineqarnerusariaqarsoraa.
- Uanga soorlu una allaaserinissaa pikkoriffigivara. Qinernikuuvara una ajornartorsiut atuakkianni taamatut eqqartornissaa. Uagut tamatta akisussaaqataassagutta Namminersorlutik Oqartussat isumalluutigiinnarnagit nammineq iliuusissaqassagutta immitsinnut qiviartariaqarpugut.
AAMMA ATUARUK Naalakkersuisut: Imminut toqunnissamik pinaveersaartitsinermik ukkatarinnitsitseqataagit
KNR-ip raadiokkut aallakaatittagaanut, Inuiaat Tillerneranut oqarpoq.
Allat pikkoriffigisaat atorluarneqarlik
- Imaassinnaavoq inuit ilai pikkoriffigigaat aqqusinermi naapitaqaraangamik kiserliorpasittumi ilaserinninnissaq. Immaqa inuit ilai oqallisaarinissaminnut pikkoriffeqarput. Inuiattut kivitseqataassagutta tamaavitta immitsinnut qiviartariaqarpugut akisussaaffimmik tigusilluta, Niviaq Korneliussen oqarpoq.
Namminersorlutik Oqartussat oqarasuaatitigut siunnersuisarfik Tusaannga siorna februaarip ulluisa aallaqqaataani ammarpaat.
Naalakkersuisut imminut toqunnissamik pinaveersaartitsinissamut nutaamik periusissiuleruttorput.
AAMMA ATUARUK Tusaannga ullormut arfineq-pingasunit saaffigineqartartoq
- Periusissiami nutaami imminut toqunnissamik pinaveersaartitsinermut suliniutit inuiaqatigiinni pisut pisariaqartinneqartullu aallaavigalugit annertusarnissaat ukkatarineqassaaq, Naalakkersuisut tusagassiuutinut nalunaarummi allapput.
- Periusissiap nutaap ineriartortinneqarnerani inuiaqatigiinnut ornigulluni inuusuttut utoqqaanerusullu tarnikkut peqqinnerulernissap anguniarnissaanut qanoq sulinissamut naliliinerannik isumassarsiaannillu tusarniarneqassapput.
Imminut toquttarnerup pinaveersaartinneqarnera erseqqarissarneqassasoq
Niviaq Korneliussen aalajangiisussaatitaasuuguni suliniuteqarnerup erseqqerinnerulersinneqarnissaa tunngaviusumik kissaatigigaluarpaa.
Taamaaliortoqanngippammi sammisaq taanna paquminartunngortinneqassasoq isumaqarpoq.
- Namminersorlutik oqartussat imminut toquttoqartarnera akiorniarlugu pinaveersaartitsinermut suliniuteqarput, kisianni nutaarsiassatigut, bussit unittarfiinni allamilluunniit, soorlu KNR-ikkut ussassaarutaateqarfiani/pilersaarutaateqarfiani, imminut toquttoqartarnera akiorniarlugu pinaveersaartitsinermut suliniutit ersinngillat.
- Sianerfissalluunniit ersinngillat. Taamaasillutik pisortatiguninngaanniit paquminarsarneqarnera ajornartorsiutaavoq.
Akerliussutsimik takutitsinermik aaqqissuisoq
Taassuma imminut toquttoqartarnerata ajornartorsiutaanera nammineerluni ukiut marluk matuma siorna ukkatarineqarniartippaa. Taassuma akerliussutsimik takutitsineq Imminornerit 0 Selvmord nammineerluni aaqqissuuppaa politikerillu suaaruteqarfiginiarlugit.
- Inuiaqatigiit iluani annaasaqarnikut amerlangaarmata eqqartornissaa imaannaanngittorujussuusarpoq, Niviaq Korneliussen til Inuiaat Tillernerannut oqarpoq.
Kalaallit Nunaanni politiit 2019-imut kisitsisitigut naatsorsueqqissaarnerat naapertorlugu inuit 45-t ukioq taanna imminut toqupput.
AAMMA ATUARUK Imminut toquttarnerup nuna tamakkerlugu ajornartorsiutaanera nassuerutigeqqugaa
Inuit 79-it imminut toqoriaraluarput, politiillu imminut toqunnissamik siorasaaruteqarneq pillugu 977-inik nalunaaruteqarfigineqarlutik.
Ikiorneqarnissamik oqaloqateqarnissamilluunniit pisariaqartitsiguit Tusaannga oqarasuaammut 801180-imut SMS-ikkulluunniit 1899-imut attaveqarsinnaavutit.
