Tusaannga ullormut arfineq-pingasunit saaffigineqartartoq
Oqarasuaatikkut sms-ikkullu siunnersuisarfik "Tusaannga"-p pilersinneqarneranit ukioq ataaseq qaangiuteqqammerpoq. Atuutilerneraniillu 2000-t sinnerlugit saaffiginnereersimapput.
Saaffiginnissutit amerlanerpaartaat imminut toqunnissamik eqqarsaateqarneq, kiserliorneq kinguaassiutitigullu atornerlugaasimaneq pillugu tunngapput.
- Inersimasut meeqqallu sianertarput. Qulit ataallugit ukiulinniit 70-it sinnerlugit ukiulinnut sianertarput, Qitiusumik siunnersuisarfimmi pisortaq Arnajaraq Poulsen oqarpoq.
Saaffiginnittartut saaffiginnissutaat assigiittorujussuupput. Inersimasut kiserliorneq, angerlarsimaffimmi ajornartorsiutit kinguaassiutitigullu atornerlugaasimanermut tunngasut saaffiginnissutaasarpoq.
- Saaffiginnittut: 2.228.
- Arnat 82 procentit angutit 18procentit.
- Inersimasuni Tusaanngamut saaffiginnittartut amerlanerpaartaat 25-t 30-llu akornanni ukioqarput. (24 procentit).
Saaffiginnissutaanerusartut:
- Kiserliorneq: 25 procentit.
- Angerlarsimaffimmi ajornartorsiutit: 25 procentit.
- Kinguaassiutitigut atornerlunneqarneq: 19 procentit.
Meeqqanut inuusuttunullu siunnersuinerit:
- Amerlanerit niviarsiaraapput 16-it 18-illu akornanni ukiullit.
- Ataaseq 13-it 15-llu akornanni ukiulik.
- Saaffiginnissutaanerusartut:
- Kiserliorneq 29 procentit.
- Imminut toqunnissamik eqqarsaateqartut: 24 procentit.
- Angerlarsimaffimmi ajornartorsiutit: 18 procentit.
- Meeqqat eqqarsaatigigaanni. Tassaasarput imminornissamik eqqarsaateqartut, kinguaassiuutitigut atornerlugaanermut tunngasut kisianni aamma angerlarsimaffimmi angajoqqaallu kamaannerit, kiserliornerlu.
Paqumigineqartut sammineqarsimatillugit saaffiginnittoqarnerusartoq
Piviusulersaarusiaq "Pilluarneq ersigiunnaarpara" kinguaassiutitigut atornerlunneqarsimanerup kingorna inuuneq pillugu KNR-imi marlunngormat aallakaatinneqarmat Tusaanngami oqarasuaatikkut saaffiginnittut naliginnaasumit pingasooriaammik amerlanerusut saaffiginnissimapput:
- Ammasarnerput sivitsulaarparput unnuk taanna taavalu ippassaq aallakaatinneqareernerata kingorna. Oqarasuaatikku siunnersortigut ulapittorujussuusimapput.
Paqumigineqartut pisoqarsimatillugu Tusaannga saaffigineqarnissaanut periarfissaasoq inuiaqatigiinnit eqqumaffigineqarnerulertarpoq.
- Ulapingaarmata inunnik marlunnik ilallugit oqarasuaatikkut siunnesuisartut sulipput.
Qitiusumik siunnersuisoqarfimmi saaffiginnittut nalunaarsorneqartarput. Kisitsisillu aallaavigalugit sumik pisariaqartitsisoqarnersoq ersertarpoq, Arnajaraq Poulsen oqarpoq.
- Takusinnaaniassagatsigu sumi pisariaqartitsisoqartoq saaffiginnittut nalunaarsortarpagut, Arnajaraq Poulsen oqarpoq.
Tusaannga ullut tamaasa nalunaaqutaq sisamaniit qulip tungaanut 80 11 80-imut sianerfigineqarsinnaavoq, SMS-ikkut 1899-mut allattoqarsinnaalluni. Saaffiginninnermi kinaassutsimik isertuussisoqarsinnaavoq.
