Imminut toquttarnerup nuna tamakkerlugu ajornartorsiutaanera nassuerutigeqqugaa
Mary Simon Nunavimmeersuuvoq, taanna Nunavimmi imminut toquttut amerlavallaarnerisa ajornartorsiutaangaatsiarnera Canadamit Nunavimmiillu pisortatigoortumik nassuerutigitinniarlugu atsiortitsinernik ukiaq katersilerpoq.
Atsiortitsinernik katersineq naggueqatigiit Inuit siuttuata soralussani aamma imminut toqussimasoq ileqqammerlugu aallartippaa.
Nunaqarfimmi Puernittumi inuusuttut aqqanillit siorna imminut toqupput. Puernittoq Nunaviup kangiatungaaniippoq 1700-nillu innuttaasoqarluni.
Nunavimmiut inuusuttut 15-it 2018-imi imminut toqupput, tamanna ajornartorsiutaangaatsiarpoq. Mary Simon KNR-imut taama oqarpoq. Ajornartorsiut Nunaviup Canadallu iliuuseqarfigissavaat.
AAMMA ATUARUK Imminut toquttarnerup akiorniarneqarnera Nunavimmi annertusarniaraat
Kuujjuarmi Nunavimmi inuusuttunut tamanut katsorsaavimmik pilersitsisoqartariaqartoq, nunaqarfinnilu inuusuttunut tamanut video atorlugu oqaloqatigiiffiusinnaasukkut soorlu skypekkut assingusukkulluunniit telemedicinimik taasagaannik katsorsarneqarsinnaasariaqartut, Mary Simonip erseqqissaatigaa.
Katsorsaanerup ingerlaannartuunissaa pingaarnerusoq, Mary Simon oqarpoq. Inuusuttut Kuujjuarmut kujataanulluunniit qaammatialunni katsorsartikkiartuinnariarlutik nunaqarfimminnut eqqortumik kiffartuussiveqanngitsumut uteqqittarnerat iluaqutaanngilaq.
Tamannami akeqarmat naalakkersuisunut kimigiisertoqassaaq. Taamaammat nunarsuarmit tamarmit atsiortitsinernik katersilluni aallartippoq maannamullu 55.000-it atsiorsimallutik.
Isumalluutit pisariaqartut angunairlugit naalakkersuisuni ministerit pingaarnerit februaarimi ataatsimeeqatigilersimallugit, Mary Simonip KNR-imut oqaatigaa.
