Imminut toquttarnerup akiorniarneqarnera Nunavimmi annertusarniaraat
Nunavimmi naggueqativut nivissat nukappissallu 13-it 22-llu akornanni ukioqartut 13-it januaarimiilli imminut toqussimapput. Taakkunannga aqqanillit Hudsonip Kangerliumanersuata kangimut sineriaani illoqarfimmi 1800-nik innuttaqartumi Puernittumeersuupput marlullu Kuussuarmeersuullutik.
Oqarasuaatikkut siunnersuineq
Imminut toqunnissamik eqqarsaateqaraanni imaluunniit imminut toquttoqarneranik misigisaqarsimagaanni oqarasuaatikkut siunnersortinnissaq nunatsinni periarfissaavoq.
Inersimasut Attavimmut oqarasuaatikkut normumut 146-mut sianersinnaapput.
Meeqqat inuusuttullu Meeqqanut-Inuusuttunullu- Oqarasuaammut normumut 134-mut sianersinnaapput.
Oqarasuaatit taakku ullut tamaasa ammasarput nal. 19.00-imit 21.00-imut.
Taamaammat Nunavimmi inuusuttut suliniaqatigiiffiini siuttut imminut toquttarnerup akiorniarnissaanut ikioqqullutik premierministeri Trudeau ministerillu allat saaffigaat.
AAMMA ATUARUK Imminut toquttarnerup pinaveersaartinniarnera Nunavimmi sammineqartoq
Mary Simon, Inuit siuttuisa ilaat Kuussuarmeersoq, sapaatit akunneri marluk matuma siorna Kuussuarmi iliseqataavoq. Taanna KNR-imut oqaluttuarpoq illoqarfik nipaangaarmat aliasuffiungaarmallu quilertarnartutut misiginartoq.
KNR-imullu ilanngullugu oqaatigaa iliuuseqarnissamut maanna piffissanngortoq. Ajornartorsiullu nutaajunngimmat ukiorpassuit matuma siorna iliuuseqartoqarsimasariaqaraluarpoq. Pissutsilli maanna ilungersunartupilussuanngorput iliuuseqarfigineqartariaqarlutillu, Nunaviummi inuusuttai annaaneqarput, Mary Simon oqarpoq. Taanna soralussaminik asangaakkaminik sapaatit akunneri marluk matuma siorna aamma annaasaqarpoq.
Tarnip pissusiinik ilisimasallit inuusuttunillu sullissisut allat amerlineqarnissaat kissaatigineqarpoq. Saaffissammi maannakkorpiaq naammanngillat, aamma amerlanerit inuktitut oqalussinnaanngillat, Inuit kulturiat ilisimasaqarfiginngilaat sivikitsuinnarmillu illoqarfiit nunaqarfiilluunniit najortarlugit.
AAMMA ATUARUK Canada: Imminut toqunnermut pinaveersaartitsinissamut periusissiaq nutaaq
Inuusuttut pisariaqartumik ikiorserneqarsinnaannginnerisa saniatigut pissutaasartut allat amerlapput: Neriuutissaarunneq, suffissaaleqineq, angerlarsimaffiillu inuusuttut kinguaassiutimikkut atornerlugaaffigisimasaat imaluunniit ilaqutariinni imigassamik atornerluinerup kingunerisaanik allatigut persuttagaanerit.
Mary Simonillu oqarneratut, nuna tamakkerlugu iliuuseqarnissamut piffissanngorpoq.
