Tasiilami erngunneq: Niuertoq ammasarfinnik sukaterisoq

Ullaap-tungaani quliniit unnukkut arferngup tungaannaanut imigassaarniartassalluni, Tasiilami niuertarfik RF Tasiilaq Facebookimi marlunngornermi ullaap-tungaani nalunaarpoq.

Aggusti ilanngullugu sivisunerorataannaasumilluunniit taamaaliussalluni, RF Tasiilaq Facebookimi aamma allappoq.

Ammasarfinnik sukaterinertik Tasiilami aasakkut ernguttoqartaqineranik peqquteqartoq, RF Tasiilaq nalunaarpoq.

Pisiniarfiup aqutsisui oqaloqatiginiaraluaratsigit ulappunnertik pissutigalugu pisinnaasimanngillat.

Ernguttoqartarnera akuersaanngikkaat

RF Tasiilap imigassaarniartarnerminik sivikilliliinera inatsisinik immini unioqqutitsinerunngitsoq, Kommuneqarfik Sermersuup Tasiilami immikkoortortaqarfiata pisortaa Hjørdis Viberg aamma isumaqarpoq.

- Pisiniarfiutillit namminersortut qanoq ilisukkut imigassaarniartassanerminnik qaqugukkulluunniit namminneq aalajangiisinnaatitaapput. Imigassaarniarnerminnillu ammasarfinnik allannguisut inatsisinik unioqqutitsinerunngitsut isumaqarpunga, taanna oqarpoq.

Tasiilamiut illoqarfimminni ernguttoqartarnerata ukiorpassuarni ajornartorsiutaanera Hjørdis Vibergip oqarnera naapertorlugu akuersaarsinnaajunnaaraluttuinnarpaat.

- Iluarinngisat eqqartorneqarneruleraluttuinnarput. Aasami silaqqitsillugu inuit illoqarfimmi ataatsimoorlutik ernguttut takussaasarput. Silagikkaangallu suli takussaanerulertarnerat nuannarinngilarput.

Innuttaasullu sumi tamaani imigassartortannginniassammata kommune illoqarfimmi pisiniarfinnik suleqateqarluni allagartalersuisaraluarpoq. 

Innuttaasut aaqqiissutissarsioqataassasut

Akuersaarsinnaajunnaaraluttuinnartoqarmallu Tasiilami innuttaasut najukkami ataatsimiititaliap isumasioqatigiinnissamut aggersassamaarai, Hjørdis Viberg oqaluttuarpoq.

Kikkut tamarmik najuuffigisinnaasaanni qanoq pissusilersortoqartassanersoq innuttaasut isumasioqatigiisinneqarnissaminni isumaqatigiissutissarsiussapput.

- Inuiaqatigiinni qanoq pissuseqarnissatsinnik kissaateqarnerput oqaluuserineqassasoq angorusupparput, qanorlu ikioqatigiilluta immitsinnullu ataqqeqatigiilluta tamatta pisariaqartitagut angusinnaanerigut eqqartortikkusupparput. Tamatta maaniissinnaassaagut, meerartatsinnut inuusuttatsinnullu qanoq maligassiuerusuppugut, taanna oqarpoq.

Aasaanera maanna sulinngiffeqarfiuleruttormat innuttaasut juulip naanerani aggustilluunniit aallartisimalernerani aatsaat isumasioqatigiisinneqarnissaat Hjørdis Vibergip ilamagaa.